ВАЛЕНСИЯ, 27 ноябрь. /"Дунё" АА/. Испаниянинг нуфузли "Levante" нашрида Ўзбекистон делегациясининг Валенсиянинг Каудете-де-Лас-Фуэнтес муниципалитетидаги чиқиндиларни қайта ишлаш заводига қилган экскурсияси ҳақида мақола эълон қилинди, деб хабар қилмоқда "Дунё" АА мухбири.

Мақолада таъкидланишича, Ўзбекистон делегацияси "Valencia Interior" (CVI) консорциуми томонидан қўлланилаётган чиқиндиларни бошқариш, қайта ишлаш ва утилизация қилиш моделини батафсил ўрганишга қизиқиш билдирган.

Ташрифдан кўзланган асосий мақсад – завод фаолияти билан яқиндан танишиш, заводда қўлланилаётган технология ва чиқиндиларни қайта ишлаш тизимини ўрганиш ҳамда ушбу илғор тажрибаларни Ўзбекистонда қўллашдан иборат.

Делегация таркибига Қорақалпоғистон экология, атроф-муҳитни муҳофаза қилиш ва иқлим ўзгариши вазири Лейли Сеитова, Ўзбекистон Экология, атроф-муҳитни муҳофаза қилиш ва иқлим ўзгариши вазирлигининг "Sustainable Solid Waste Management" лойиҳаси раҳбари Умрбек Сабиров ҳамда Чиқиндиларни бошқариш ва циркуляр иқтисодиётни ривожлантириш агентлиги вакиллари кирган.

"Завод йилига 40 минг тонна чиқиндини қайта ишлаш қувватига эга. Ушбу корхонада чиқиндилар утилизация қилиниб, янги ишлаб чиқариш жараёнларига йўналтирилади", – деб ёзади нашр.

Экскурсия давомида делегация аъзолари пластик, металл, картон ва шишани селектив ажратиб олиш технологиялари, тромеллар, сепараторлар, магнит ва индуктив тизимлар билан танишиш имконига эга бўлган.