БЕРЛИН, 17 июнь. /“Дунё” АА/. Германияда мамлакатимизнинг иқтисодий ва сармоявий салоҳиятига бағишланган “Uzbekistan – invest now” журналининг навбатдаги сони нашр этилди, деб хабар бермоқда “Дунё” АА мухбири.

Нашрда Ўзбекистоннинг Германиядаги элчиси Дилшод Аҳатовнинг 16–18 июнь кунлари пойтахтимизда бўлиб ўтадиган V Тошкент халқаро инвестиция форуми (ТХИФ-2026) бўйича берган интервьюси чоп этилган. Мулоқотда ушбу форум Ўзбекистоннинг энг муҳим инвестиция платформаси ва Марказий Осиё минтақасидаги йирик иқтисодий анжуманлардан бири сифатида баҳоланган.

Элчи ўз интервьюсида сўнгги йилларда ТХИФ давлатлар, халқаро инвесторлар ва жаҳон бизнеси вакилларини бирлаштирадиган, минтақада амалий инвестиция кун тартибини шакллантирувчи самарали механизмга айланганини таъкидлаган. Ўзбекистон Президенти раҳбарлигида амалга оширилаётган кенг кўламли иқтисодий ислоҳотлар туфайли мамлакат минтақавий инвестиция хаби мақомини изчил мустаҳкамлаб, узоқ муддатли барқарор ҳамкорлик муҳитини яратмоқда.

Материалда ўтган йилги ТХИФ-2025 натижаларига ҳам алоҳида тўхталиб ўтилган. Қайд этилишича, ўтган йилги анжуманда 97 мамлакатдан 8 мингдан ортиқ делегат иштирок этган ва умумий ҳажми 30,5 миллиард АҚШ долларини ташкил этувчи инвестиция битимлари имзоланган.

Бу йилги форумнинг нуфузи ва миқёси янада юқори экани қайд этилган. Жумладан, тадбирда Германия Президенти Франк-Вальтер Штайнмайер, Европа тикланиш ва тараққиёт банки (EBRD), Европа инвестиция банки (EIB), Осиё тараққиёт банки (ADB) ва Халқаро молия корпорацияси (IFC) раҳбарлари, етакчи давлат жамғармалари ҳамда экспорт-кредит агентликлари вакиллари иштирок этиши кўзда тутилган.

Интервьюда Ўзбекистоннинг саноат, “яшил” энергетика, қишлоқ хўжалиги, IT, туризм, транспорт ва логистика соҳалари хорижий сармоядорлар учун энг истиқболли йўналишлар сифатида кўрсатилган. Шу билан бирга, мамлакатнинг Жаҳон савдо ташкилотига аъзо бўлиш жараёни халқаро инвесторлар учун янги имкониятлар эшигини очиши маълум қилинган.