ЛОНДОН, 9 сентябрь. /“Дунё” АА/. Британиянинг машҳур “Wild Frontiers” сайёҳлик компанияси порталида Фарғона водийсининг анъанавий ҳунармандчилиги, ипакчилик ва кулолчилигига бағишланган мақола эълон қилинди, деб хабар бермоқда “Дунё” АА мухбири.

Мақолада ёзилишича, Марғилон шаҳри Ўзбекистоннинг ипакчилик бўйича пойтахти саналади. Маҳаллий устахоналарда ипак қуртини етиштириш ва пиллага ишлов беришдан тортиб, уни бўяш ҳамда тўқишгача бўлган ишлаб чиқариш жараёнини бевосита кузатиш мумкин.

Маълумотларга кўра, матоларни олдиндан боғлаб бўяшнинг анъанавий усуллари мураккаб ва ёрқин нақшлар ҳосил қилиш имконини беради. Усталар матони бўяшдан олдин уни эҳтиёткорлик билан тахлайди ва боғлайди. Бу жараёнда бўёқ ҳарорати ҳам қатъий ҳисобга олинади.

Ҳунармандчилик санъатининг яна бир муҳим маркази сифатида Риштон эътироф этилган. Бу ерда ясаладиган ҳунармандчилик маҳсулотлари ўзига хос кўк, яшил ва феруза рангли керамикаси билан жаҳонга машҳур.

Риштон ҳунармандчилигида қўлда ишланган нақшларга алоҳида эътибор берилади. Рассомлар мураккаб гулли ва геометрик нақшларни баъзи усталар ҳайвонлар жунидан мустақил равишда тайёрлайдиган мўйқаламлар ёрдамида чизади. Шу боис ҳам бу ҳунармандчиликда иккита мутлақо бир хил маҳсулотни учратиш амри маҳол.

Нашрда қайд этилишича, Марғилон ва Риштон устахоналари нафақат ҳунармандчиликни намойиш этувчи жойлар, балки қадимий кўникмалар кундалик ҳаётнинг ажралмас қисми бўлиб қолётган ҳақиқий ижод масканларидир.

Сайёҳлар буюмларни бевосита усталарнинг ўзидан сотиб олиши мумкин, бу эса, ўз навбатида, анъанавий ҳунармандчиликни қўллаб-қувватлаш ва сақлаб қолишга хизмат қилади.