ХАНЧЖОУ, 9 сентябрь. /“Дунё”АА/. Халқаро савдони ривожлантиришга кўмаклашиш Хитой қўмитасининг (CCPIT) Чжэцзян провинцияси департаменти йиллик сессияси доирасида Ўзбекистон инвестициявий салоҳиятининг тақдимоти бўлиб ўтди, деб хабар бермоқда “Дунё” АА мухбири.

Тадбир иштирокчиларига мамлакатимизда амалга оширилаётган ислоҳотлар, иқтисодиётни либераллаштириш ва қулай инвестиция муҳитини яратиш борасидаги чора-тадбирлар, шунингдек, Ўзбекистон ва Хитой ўртасидаги стратегик шериклик доирасида қўшма ҳудудий ва тармоқ лойиҳаларини ривожлантириш имкониятлари ҳақида атрофлича маълумот берилди.

Хитойлик тадбиркорларга Ўзбекистоннинг инфратузилмавий имкониятлари ҳамда хорижий инвесторларни қўллаб-қувватлаш чоралари, жумладан, солиқ ва божхона имтиёзлари, экспортни қўллаб-қувватлаш ҳамда Марказий Осиё, МДҲ ва Европа Иттифоқи бозорларига чиқиш афзалликлари тушунтирилди.

Чжэцзян провинцияси ишбилармон доираларида инфратузилма, энергетика, кон-кон саноати, қишлоқ хўжалиги ва юқори технологиялар соҳаларидаги лойиҳалар катта қизиқиш уйғотди.

Ташкилотчиларнинг таъкидлашича, ушбу тадбир Чжэцзян провинцияси ҳамда Марказий Осиё ва Шимолий Африка мамлакатлари ўртасидаги савдо-иқтисодий ҳамкорликни чуқурлаштиришга қаратилган ишларнинг мантиқий давоми бўлиб, ўзаро савдо ва инвестициялар учун янги имкониятлар очади.