ТОШКЕНТ, 9 октябрь. /“Дунё” АА/. 2026 йил 27–29 октябрь кунлари Тошкент шаҳридаги “Ўзэкспомарказ” МККда “Тоғ-кон иши, металлургия ва металлсозлик – MiningMetals Uzbekistan 2026” халқаро кўргазмаси бўлиб ўтади, деб хабар бермоқда “Дунё” АА мухбири.

Кўргазма “Iteca Exhibitions” халқаро кўргазма компанияси ва унинг ҳамкори “ICA Eurasia Group” ташкилотчилигида ўтказилади.

Бу йил ўзининг 20 йиллик юбилейини нишонлаётган “MiningMetals Uzbekistan” мамлакатда соҳанинг етакчи кўргазма тадбири ҳисобланади. У анъанавий тарзда сўнгги ечимлар ва инновацияларни намойиш этиш, шериклик алоқаларини кенгайтириш, замонавий ускуна ва технологиялар билан танишиш ҳамда корхоналарни ривожлантириш учун майдон вазифасини ўтамоқда.

Бугунги кунга қадар Австралия, Беларусь, Эрон, Эстония, Финляндия, Германия, Испания, Канада, Корея Республикаси, Қирғизистон, Қозоғистон, Россия, Сербия, Туркия, Хитой ва Ўзбекистон каби 16 мамлакатдан 150 дан ортиқ иштирокчи кўргазмада қатнашишини билдирган.

Ташриф буюрувчилар кўргазмада тоғ-кон саноати ва бойитиш техникаси, металлургия ва металлсозлик ускуналари, минерал хомашёни ташиш ва қайта ишлаш, рақамлаштириш, автоматлаштириш ҳамда саноат хавфсизлигини таъминлаш технологиялари билан танишишлари мумкин.

Германия бу гал ҳам миллий павильон форматида иштирок этади. Хитой ва Туркия ишлаб чиқарувчилари кенг кўламли экспозицияни намойиш этади.

Мамлакатимизнинг миллий стенди Ўзбекистон Тоғ-кон саноати ва геология вазирлигининг интеграциялашган стенди форматида тақдим этилади. Унда мамлакатнинг тоғ-кон ва металлургия саноатидаги етакчи корхоналари – “Навоий” КМК, “Олмалиқ” КМК, “Ўзметкомбинат”, Ўзбекистон технологик металлар комбинати ва “Навоиуран” иштирок этади.

Кўргазманинг бизнес дастури доирасида “Ресурслардан глобал имкониятларгача” шиори остида “8-Ўзбекистон халқаро кон-металлургия форуми – UIMF 2026” ташкил этилади.

“UIMF 2026” тоғ-кон ва металлургия саноатининг етакчи вакиллари, давлат тузилмалари, инвесторлар, технологик компаниялар ҳамда Марказий Осиёнинг илмий ҳамжамиятини бирлаштиради.

Кўргазма иштирокчилари билан шахсан учрашиш ва ҳамкорлик бўйича келишувлар тузиш имкониятидан фойдаланиш учун фаол рўйхатдан ўтиш бошланган. Олдиндан рўйхатдан ўтинг ва ўзингизни қизиқтирган компаниялар билан учрашувларни режалаштиринг.

Онлайн рўйхатдан ўтиш: https://bit.ly/MMUZ_dunyo_uz

“UIMF 2026” форумида делегат сифатида иштирок этиш учун ҳам рўйхатдан ўтиш бошланди: https://uimf.uz/uz/forma-zaprosa

Саволларингиз бўлса, ташкилотчиларга мурожаат қилинг:

Тел.: +998 71 205-18-18, +998 50 760-51-54.

Электрон почта: mining@iteca.uz