ОСТОНА, 8 октябрь. /“Дунё” АА/. Тошкентдаги “Ўзэкспомарказ” миллий кўргазмалар мажмуасида 11 та давлатдан 200 дан ортиқ компания ва брендларни бирлаштирган “Aquatherm Tashkent 2026” халқаро кўргазмаси бўлиб ўтмоқда, деб хабар бермоқда “Дунё” АА мухбири Қозоғистоннинг “INFOZAKON” нашрига таяниб.

Экспозицияда иситиш, вентиляция, ҳавони тозалаш ва совутиш, сув таъминоти, сантехника, ҳавзалар, сувни тозалаш ҳамда муҳандислик инфратузилмасининг бошқа йўналишлари учун мўлжалланган технологиялар ва ускуналар намойиш этилди.

Кўргазмада Беларусь, Германия, Эрон, Италия, Қозоғистон, Хитой, Корея Республикаси, Польша, Россия, Туркия ва Ўзбекистондан компаниялар иштирок этди.

Бу йилги янги йўналишлардан бири оқова сувларни тозалаш бўлди. Мазкур йўналишнинг дастурга киритилиши сув ресурсларидан оқилона фойдаланиш, инфратузилмани янгилаш ҳамда сув ҳавзаларининг ифлосланишини олдини олиш ва камайтиришда муҳим аҳамиятга эга.

Тадбир доирасида мутахассисларнинг маърузалари, касбий маҳорат танловлари ва амалий маҳорат дарслари ўтказилди. Иштирокчилар ва ташриф буюрувчилар илғор ечимларни тақдим этиш, лойиҳаларни муҳокама қилиш ҳамда амалий алоқалар ўрнатиш имкониятига эга бўлди.

Кўргазма Ўзбекистон ва бошқа мамлакатларнинг ишлаб чиқарувчилари, етказиб берувчилари, қурувчилари, лойиҳачилари ҳамда қурилиш ва коммунал соҳалар вакиллари учун ўзаро ҳамкорлик майдонига айланди.