БРЮССЕЛЬ, 4 июнь. /“Дунё” АА/. Бельгиянинг нуфузли “Eureporter” ва “Eureflect” нашрларида Ўзбекистон билан икки томонлама ҳамкорликнинг янги ривожланиш босқичига бағишланган “Бельгия Тошкентда элчихона очмоқда” сарлавҳали мақола эълон қилинди, деб хабар қилмоқда “Дунё” АА мухбири.

Мақолада ёзилишича, сўнгги ўн йилликда Ўзбекистон ва Бельгия ўртасидаги дипломатик ва иқтисодий ҳамкорлик сезиларли даражада ривожланди. Бельгиянинг Тошкентда элчихона очиш қарори шунчаки маъмурий қадам эмас, балки Ўзбекистоннинг Марказий Осиёдаги геосиёсий ва иқтисодий аҳамиятининг ортиши ва Европа билан минтақавий стратегик муносабатларнинг кенгайишидан далолат беради.

Бельгия Ўзбекистон мустақиллигини 1991 йилда тан олган ва расмий дипломатик алоқалар 1992 йилда ўрнатилган. 1995 йилдан бери Ўзбекистоннинг Брюсселда элчихонаси фаолият юритиб, Европа Иттифоқи ва Бельгия билан доимий мулоқотни таъминлаб келмоқда. Янги Тошкентда элчихона очилиши икки томонлама муносабатларда янги босқич ва Ўзбекистоннинг Марказий Осиёдаги муҳимлигига белгидир.

Президент Шавкат Мирзиёевнинг Европа билан очиқ ва дипломатик интеграция сиёсати Европа ҳукуматлари учун Ўзбекистонни стратегик ҳамкор сифатида кўришга замин яратди. Мирзиёевнинг 2025 йилда Брюсселга ташрифи ва қирол Филипп билан учрашуви икки давлат ўртасида савдо, сармоя, логистика ва инфратузилма соҳаларида ҳамкорликни мустаҳкамлаш имконини берди.

Нашрларда қайд этилишича, парламентлараро дўстлик гуруҳлари ва вазирлар даражасидаги алоқалар икки мамлакатнинг сиёсий ва иқтисодий ҳамкорлигини институционал асосда мустаҳкамлайди. Бу механизмлар савдо, туризм, таълим ва гуманитар соҳаларда ҳамкорликни ривожлантиришга хизмат қилади.

Икки давлат ўртасидаги савдо ҳажми 2020 йилдаги 70 миллион доллардан 2024 йилда 212,7 миллион долларга ошди. Ўзбекистон асосан саноат маҳсулотлари, озиқ-овқат ва кимё маҳсулотлари экспорт қилади, Бельгиядан эса машиналар, саноат ускуналари, фармацевтика ва технологик қисмлар импорт қилинади.

Бельгия компаниялари, жумладан “Picanol” ва “Van de Wiele” Ўзбекистон тўқимачилик саноатини модернизация қилишда муҳим рол ўйнамоқда. Шунингдек, яшил технологиялар, барқарор энергия ва экологик лойиҳалар ҳамкорлик доирасида кенгаймоқда. 2024 йил май ойида Бельгия ишбилармонлари делегацияси Ўзбекистонга ташриф буюрди, фармацевтика, қишлоқ хўжалиги ва IT соҳаларида инвестиция ва ҳамкорлик имкониятлари муҳокама қилинди.

Бельгия Ўзбекистонда логистика, транспорт ва саноат инфратузилмасини модернизация қилишда қимматли ҳамкор ҳисобланади. Шу билан бирга, Ўзбекистон–Туркманистон транспорт йўналиши Марказий Осиё ва Европа ўртасида стратегик савдо ва транзит имкониятларини кенгайтиришда муҳим аҳамиятга эга.

Бенилюкс Савдо палатаси Тошкентда ташкил этилиб, иқтисодий ҳамкорликни институционал асосда қўллаб-қувватлайди, савдо кўргазмалари ва роуд-шоулар орқали бизнес ва инвестиция имкониятларини кенгайтирмоқда.

Мақола хулосасида таъкидланишича, Бельгиянинг Тошкентда элчихона очиши дипломатик қадамдан кўра кўпроқ маънога эга. Бу Ўзбекистоннинг Марказий Осиёдаги стратегик аҳамиятини ва Европа билан иқтисодий ва геосиёсий интеграциядаги муҳим ролини тан олишдир.

Янги дипломатик ва иқтисодий ташаббуслар Ўзбекистонни Европа ва Осиё ўртасидаги келажакдаги савдо, транспорт ва инновацион алоқалар марказига айлантиришга хизмат қилади.