ПРАГА, 1 сентябрь. /“Дунё” АА/. Ўзбекистон элчихонасида “I.K.S group a.s.” компанияси раиси Карел Шимак ва унинг ҳамкорлари билан учрашув ўтказилди, деб хабар бермоқда “Дунё” АА мухбири.

Унда Жиззах вилоятида сувни тозалаш ва чучуклаштириш, оқова ва шўр сувларни қайта ишлаш, шунингдек, маиший ва саноат чиқиндиларидан органик ҳамда минерал ўғитлар ишлаб чиқаришни назарда тутувчи йирик инвестиция лойиҳаси муҳокама қилинди.

Лойиҳа доирасида маҳаллий тадбиркор иштирокида “Luxe Shedevr Garden” МЧЖ қўшма корхонаси ташкил этилган. Дастлабки босқичда Арнасой туманида сув тозалаш иншоотини барпо этиш режалаштирилмоқда. Бу босқич учун инвестиция ҳажми тахминан 200 миллион евро деб баҳоланмоқда. Якуний сумма иншоот қуввати ва техник параметрлар аниқлангач белгиланади.

Чехия томони “ARBOK Water Desalination & Brine Utilization Technology” технологиясини тақдим этди. Мазкур технология сувни, жумладан, шўр сувларни тозалаш ва чучуклаштириш, шунингдек, жараёнда ҳосил бўладиган концентрланган шўр эритмани қайта ишлашга мўлжалланган.

Ташаббускорлар технологияни Ўзбекистон шароитида жорий этишдан аввал лаборатория прототипини синаб кўриш ва натижаларни мустақил аккредитацияланган лабораторияларда текширишни режалаштирмоқда. Лойиҳани асосан хорижий инвестициялар, жумладан, “I.K.S group a.s.” ва унинг ҳамкорлари консорциуми маблағлари ҳисобидан молиялаштириш таклиф этилмоқда.

Айни пайтда лойиҳа бўйича асосий музокаралар Жиззах вилояти ҳокимлиги билан олиб борилмоқда. Кейинги босқичда сувга бўлган эҳтиёж, тозалаш қуввати ва бошқа техник талаблар аниқланиб, шундан сўнг лойиҳанинг якуний инвестиция ҳажми ва молиявий модели ишлаб чиқилиши режалаштирилган.