ЛОНДОН, 28 октябрь. /“Дунё” АА/. “Ўзбекнефтегаз” АЖ бошқаруви раисининг биринчи ўринбосари Суҳроб Ҳамроев бошчилигидаги делегациянинг Буюк Британияга ташрифи ташкил этилди, деб хабар бермоқда “Дунё” АА мухбири.

Ташриф доирасида қатор учрашувлар ўтказилди. Хусусан, “Standard Chartered Bank”, “ICBC Standard Bank”, “MUFG Bank”, “Deutsche Bank” ва “J.P. Morgan” банклари, “Fitch Ratings” ҳамда “S&P Global Ratings” рейтинг агентликлари, “Ashmore Group”, “UBS Asset Management”, “Vanguard”, “Fidelity International”, “PIMCO” ва “T. Rowe Price” инвестиция компаниялари раҳбарияти, шунингдек, “Ўзбекнефтегаз” еврооблигациялари эгалари билан мулоқотлар бўлиб ўтди.

Учрашувларда компаниянинг молиявий ва ишлаб чиқариш кўрсаткичлари, корпоратив трансформация жараёнлари, соҳадаги тенденциялар ва газ қазиб чиқаришни барқарорлаштириш чора-тадбирлари муҳокама қилинди. Халқаро банкларни молиялаштириш жараёнига жалб этиш мақсадида тўртта истиқболли лойиҳа тақдим этилди.

Халқаро молия институтлари вакиллари компанияда амалга оширилаётган ислоҳотларни эътироф этдилар. Томонлар ҳамкорликни давом эттириш юзасидан келишиб олдилар.