ВАШИНГТОН, 6 май /“Дунё” АА/. АҚШдаги нуфузли “Diplomatic Watch” халқаро таҳлилий платформасида “Ўзбекистоннинг Жаҳон чемпионатига йўлланма олиши спорт дипломатиясида янги босқични бошлаб бермоқда” сарлавҳали мақола эълон қилинди, дея хабар бермоқда “Дунё” АА мухбири.

Мақолада ёзилишича, футбол бўйича Ўзбекистон миллий терма жамоасининг 2026 йилги ФИФА Жаҳон чемпионатига йўлланмаси турнирдаги илк иштироки бўлади. Ўзбекистоннинг Жаҳон чемпионатига тарихий йўлланмани қўлга киритиши, нафақат муҳим спорт ютуғи, балки мамлакатнинг ривожланиб бораётган спорт дипломатиясида янги босқични бошлаб берди.

Ушбу муваффақият бир марталик натижа эмас, балки узоқ муддатли ва тизимли ёндашув самарасидир. Жумладан, ёшлар футболини ривожлантириш, спорт инфратузилмасини модернизация қилиш ҳамда халқаро ҳамкорликни кенгайтириш ушбу ютуқнинг муҳим омиллари сифатида эътироф этилган. Шу нуқтаи назардан, футбол тобора Ўзбекистоннинг халқаро майдондаги нуфузини оширувчи муҳим воситага айланиб бормоқда.

Платформада шунингдек, хорижда, хусусан Европа чемпионатларида фаолият юритаётган ўзбекистонлик футболчилар ҳақида ҳам тўхталиб ўтилган. Жумладан, Абдуқодир Ҳусанов халқаро майдондаги ўйинлари орқали эътибор қозонаётгани, тажрибали ҳужумчи Элдор Шомуродов эса миллий терма жамоада етакчилик ва барқарорликни таъминлаётгани таъкидланган. Истеъдодли ёш футболчи Аббосбек Файзуллаев эса замонавий футбол талабларига мослашиб бораётган янги авлод вакили сифатида эътироф этилган.

Манбага кўра, ёшлар терма жамоаларининг изчил муваффақиятлари ҳам ушбу тараққиётда муҳим ўрин тутади. Жумладан, Ўзбекистон U-23 терма жамоаси 2018 йилда Осиё чемпиони бўлган, U-20 жамоаси 2023 йилда Осиё кубогини қўлга киритган, U-17 жамоаси эса 2025 йилда Осиё чемпионига айланган. Бу натижалар ёшлар тизими билан миллий терма жамоа ўртасида узвий боғлиқлик шаклланганини кўрсатади.

Нашрда қайд этилишича, спорт инфратузилмаси, мураббийлик тизими ва футбол академияларига йўналтирилган изчил инвестициялар мамлакатда олиб борилаётган кенг қамровли модернизация жараёнлари билан уйғун ҳолда амалга оширилмоқда. Бу Ўзбекистоннинг жаҳон футболидаги иштирокини кенгайтириш ва халқаро ҳамкорлик алоқаларини мустаҳкамлашга хизмат қилмоқда.

Таҳлилчиларга фикрича, миллий терма жамоанинг халқаро майдондаги иштироки эндиликда фақат спорт натижалари билан чекланиб қолмайди. Ҳар бир ўйин ва иштирок мамлакатнинг халқаро қиёфасини шакллантириш, янги ҳамкорлик алоқаларини йўлга қўйиш ҳамда кенг аудиторияни жалб этиш имконини беради.

“Diplomatic Watch” нашри Ўзбекистон футболининг юксалишини узоқ муддатли стратегик режалаштириш ва халқаро ҳамкорлик самараси сифатида баҳолайди. Ушбу жараён эса спорт орқали дипломатия, маданий алмашинув ва миллий ўзликни намоён этиш имкониятларини янада кенгайтираётгани алоҳида қайд этилган.