ҚОҲИРА, 9 июль. /“Дунё” АА/. Мисрнинг етакчи ОАВ Тошкент, Самарқанд ва Термиз шаҳарларида бўлиб ўтаётган биринчи Халқаро ислом цивилизацияси форуми ҳақида туркум мақолалар эълон қилди, деб хабар бермоқда “Дунё” АА мухбири.

“Ал-Аҳрам” газетасининг хабар беришича, ушбу тадбирда Миср Вақфлар вазири Усама ал-Азҳарий бошчилигидаги нуфузли делегация иштирок этмоқда. Анжуман дунёнинг 40 дан ортиқ мамлакатидан расмий шахслар, экспертлар ва олимларни бир майдонга жамлади.

Нашр таъкидлаганидек, форум ислом цивилизациясининг инсоният, илм-фан ва маърифат ривожига қўшган ҳиссасини кенг ёритиш, тинчлик ва бағрикенглик ғояларини илгари суриш ҳамда илмий ва маданий муассасалар ўртасидаги ҳамкорликни мустаҳкамлашга хизмат қилмоқда.

Миср матбуотида Ўзбекистон Президентининг форум иштирокчиларига йўллаган мурожаатига эътибор қаратди. “Le Progrès Egyptien” нашри ҳамда “МЕНА” ахборот агентлиги тарқатган хабарларда қайд этилишича, Президент мурожаатида ушбу форумнинг Ўзбекистондаги Ислом цивилизацияси марказида ўтказилиши катта рамзий маънога эга.

“Ал-Аҳрам” газетасининг ёзишича, форумнинг дастлабки кунлари иштирокчилар томонидан Ҳамкорлик декларацияси қабул қилинган. Ҳужжатда Ўзбекистон Президенти Шавкат Мирзиёевга 2017 йилда БМТ Бош Ассамблеясининг 72-сессиясида илгари сурган ташаббуси учун миннатдорлик билдирилган.

Ушбу ташаббуснинг амалий ифодаси сифатида Тошкентда Ислом цивилизацияси маркази ташкил этилди ва мазкур форум ушбу янги мажмуада ўтказилмоқда. Шунингдек декларацияда, жаҳолат, экстремизм, ксенофобия, исламофобия ва ислом меросини сохта талқин қилишга қарши биргаликда курашиш зарурлиги баён этилган.

Форум доирасида Ўзбекистон Олий таълим, фан ва инновациялар вазири Қўнғиратбай Шарипов ва Миср Олий таълим ва илмий тадқиқотлар вазири Абдулазиз Консува ўртасида бўлиб ўтган учрашувга ҳам тўхталиб ўтилган.

“Ал-Ахбар” газетаси хабарига кўра, томонлар таълим ва фан соҳасидаги ҳамкорликни муҳокама қилиб, шу йил июль ойида Қоҳирада “Study in Uzbekistan” кўргазмаси ўтказилишини ҳамда 2026–2030 йилларга мўлжалланган ҳамкорлик дастури тайёрланаётганини маълум қилган.