КАТМАНДУ, 16 декабрь. /«Дунё» АА/. «Nepal Diplomat» электрон нашри сайтида Катманду шаҳрида бўлиб ўтган «Непал – Ўзбекистон: савдо ва инвестициявий алоқаларни мустаҳкамлаш» мавзусидаги давра суҳбати якунларига бағишланган мақола чоп этилди, деб хабар бермоқда «Дунё» АА мухбири.

Материалда Ўзбекистоннинг Марказий Осиёдаги асосий иқтисодий марказ сифатидаги роли тобора ортиб бораётгани қайд этилган. 2024 йил мамлакатимиз ялпи ички маҳсулоти қарийб 115 миллиард АҚШ долларига етгани маълум қилинган.

Нашр Ўзбекистондаги қулай ва жозибадор бизнес муҳитга алоҳида эътибор қаратиб, 2018 йилдан буён мамлакатга жалб этилган тўғридан-тўғри хорижий инвестициялар ҳажми 120 миллиард АҚШ долларини ташкил этганини таъкидлаган.

Непал ишбилармон доиралари вакилларининг диққат марказида, айниқса, тўқимачилик саноати, қайта тикланувчи энергия манбалари ва тоғ-кон саноати каби тармоқлар бўлиб турибди.

Муаллиф Ўзбекистоннинг Марказий Осиё минтақавий бозорига чиқишдаги стратегик дарвоза сифатидаги устуворлигини алоҳида қайд этган.

Тадбирда Непал расмий шахслари, бизнес доиралар вакиллари ва давлат органлари мутасаддилари иштирок этгани урғуланган.

«Nepal Diplomat» нашридаги ушбу мақола халқаро ҳамжамиятнинг Ўзбекистондаги иқтисодий ислоҳотларга бўлган қизиқиши ортиб бораётганидан ҳамда Жанубий Осиё мамлакатларининг икки томонлама шерикликни чуқурлаштиришга тайёрлигидан далолат беради.

Эслатиб ўтамиз, 2025 йил 11 декабрь куни Ўзбекистоннинг Непалдаги биринчи элчиси Сардор Рустамбоев (қароргоҳи Деҳли шаҳрида жойлашган) Президент Рамчандра Пауделга ишонч ёрлиқларини топширди.

Ушбу воқеа арафасида, 10 декабрь куни Катмандуда Ўзбекистон ва Непал ўртасидаги савдо-иқтисодий ва инвестициявий ҳамкорликни янада ривожлантириш масалаларига бағишланган давра суҳбати бўлиб ўтди.

Для гиперссылки:

https://dunyo.info/uzk/news/ozbekistonning-nepaldagi-birinchi-elchisi-ushbu-mamlakat-prezidentiga

https://dunyo.info/uzk/news/v-katmandu-proshel-uzbeksko-nepalskiy-kruglyy-stol-po-razvitiyu