МАСКАТ, 12 декабрь. /“Дунё” AA/. Ўмоннинг нуфузли “Asdaa Oman” газетасида “Ўзбекистон иқтисодиёти 7,5 фоизга ошиши кутилмоқда” сарлавҳали мақола эълон қилинди, деб хабар қилмоқда “Дунё” АА мухбири.

Газета Ўзбекистон иқтисодиёт тадқиқотлари ва ислоҳотлар марказининг янгиланган баҳоларига ишора қилган ҳолда, Ўзбекистон иқтисодиёти 7,5% га ўсиши мумкинлигини маълум қилган.

“Бу ўсиш ички талабнинг кенгайиши, экспорт ва инвестицияларнинг ошиши ҳисобига юзага келмоқда. 2024 йилнинг тўққиз ойида ЯИМ 7,6% га ўсди, ташқи савдо, инвестициялар ва халқаро пул ўтказмалари сезиларли даражада ошди. Октябрда бизнес фаоллиги индекси ўтган йилга нисбатан 34,2% га кўтарилди. Марказ модели 2025 йил учун ЯИМнинг 7,3–7,7% оралиғида ўсишини прогноз қилмоқда. Иқтисодий ўсишга асосан бизнес фаоллиги, уй-жой бозори, саноат ишлаб чиқариши ва банк сектори таъсир кўрсатмоқда”, – деб ёзган муаллиф.

Мақола хулосасида таъкидланишича, мазкур прогнозлар кенг ахборот базаси ва тезкор прогнозлаш моделлари асосида тайёрланган. Халқаро ташкилотлар ҳам прогнозларини оширган: Халқаро валюта жамғармаси 7,3%, Жаҳон банки 6,2%, Осиё тараққиёт банки 6,6% ўсишни кутмоқда. Миллий ва халқаро баҳолар таққосланганда марказ прогнозларининг асослилиги тасдиқланади.