БЕЛГРАД, 7 сентябрь. /“Дунё” АА/. Сербиянинг “Euronews Srbija” порталида Президент Шавкат Мирзиёевнинг Сербияга бўлажак расмий ташрифига бағишланган мақола эълон қилинди, деб хабар бермоқда “Дунё” АА мухбири.

Нашрда Ўзбекистон Иқтисодий тадқиқотлар ва ислоҳотлар марказининг маълумотлари келтирилади: 2016 йилдан 2025 йилгача мамлакатлар ўртасидаги товар айирбошлаш қарийб 9 бараварга — 1,4 миллион доллардан 12 миллион долларгача ўсган.

Ўзбекистонда Сербия сармояси иштирокидаги 9 та корхона фаолият юритмоқда ва ушбу даврда Сербиядан жалб этилган тўғридан-тўғри инвестициялар ҳажми 2,2 миллион АҚШ долларини ташкил этган.

Мақолада ёзилишича, Ўзбекистон Сербияни Европа бозорларига чиқиш йўлида дарвоза, Сербия эса Ўзбекистонни Марказий Осиёга чиқиш учун платформа сифатида билади. Машинасозлик, фармацевтика, энергетика, тўғридан-тўғри авиақатновларни йўлга қўйиш ҳамда мамлакат компанияларининг Сербия темирйўл лойиҳаларида иштирок этиши ҳамкорликнинг устувор йўналишлари сифатида белгиланган.

Давлатимиз раҳбарининг бўлажак ташрифи савдодан чуқур саноат кооперациясига ўтиш, ишлаб чиқаришни маҳаллийлаштириш ва учинчи мамлакатлар бозорларига биргаликда чиқишга туртки бериши кутилмоқда.