САНКТ-ПЕТЕРБУРГ, 24 сентябрь. /“Дунё” АА/. Россиянинг “Индустрия туризма и культуры” журналида Георг Фридрих Генделнинг “Тамерлано” операсининг Россиядаги премьерасига бағишланган мақола чоп этилди, деб хабар бермоқда “Дунё” АА мухбири.

Нашрда ёзилишича, 160 нафардан ортиқ санъаткорни бирлаштирган йирик халқаро лойиҳа Ўзбекистон Маданият ва санъатни ривожлантириш жамғармаси томонидан “Санкт-Петербург мавсумлари” фестивали доирасида ташкил этилди. Ушбу опера Санкт-Петербургдаги Мариин театрининг янги саҳнасида намойиш этилди.

Спектакль режиссураси ва визуал саҳналаштириш бўйича таниқли италиялик режиссёрлар Стефано Пода ҳамда Паоло Жани Чеи ҳамкорликда ишлади.

Операда бош ролни Ўзбекистон халқ артисти Женисбек Пиязов ижро этган. Спектаклда испаниялик Хуан Санчо, аргентиналик Вероника Канхеми ҳамда ўзбекистонлик Юлдуз Ражабова ҳам рол ижро этган.

Томошанинг янада қизиқарли бўлишида Ўзбекистон хор жамоаси, “Ўзбегим” гуруҳи ва Абдукарим Ошурматов раҳбарлигидаги Халқ чолғулари оркестрининг иштироки муҳим аҳамият касб этди.

Мақолада мусиқий анъаналарнинг ўзига хос уйғунлигига ҳам алоҳида урғу берилган. Генделнинг 1724 йилда яратилган классик асари композитор Кирилл Рихтернинг янги талқинида, ўзбек миллий чолғулари интеграцияси билан, Алибека Кабдурахманов раҳбарлигидаги Ўзбекистон Миллий симфоник оркестри ҳамроҳлигида ижро этилди.

Тошкентдаги жаҳон премьераси, БААдаги “Dubai Opera” ва Австриядаги “Musikverein” саҳналаридаги намойишлардан сўнг, Санкт-Петербургдаги премьера лойиҳанинг халқаро гастролларини муваффақиятли давом эттирди.