БЕРЛИН, 24 апрель. /“Дунё” АА/. Германиянинг “Ostdeutschen Allgemeinen” электрон нашри Саксония федерал ўлкасида жойлашган, кўп йиллик тарихга эга “Damino” тўқимачилик корхонаси ўзбекистонлик инвестор томонидан сотиб олиниши ҳақида мақола эълон қилди, деб хабар бермоқда “Дунё” АА мухбири.

Маълум қилинишича, Гроссшёнау шаҳрида фаолият юритувчи мазкур корхонани сақлаб қолиш юзасидан тегишли музокаралар олиб борилмоқда. Ўзбекистонлик инвестор корхонани сотиб олишга қизиқиш билдирган ва харид қийматининг бир қисмини аллақачон тўлаган. Қайд этилишича, сотиб олиш бўйича шартнома корхона кредиторлари банкротлик режасини маъқуллаганидан сўнггина кучга киради.

Немис матбуоти маълумотига кўра, 2025 йил сентябрь ойидан бери ўз-ўзини бошқариш тартибида банкротлик жараёнини бошдан кечираётган “Damino” айни вақтда 50 нафарга яқин ходимни иш билан таъминлаб келмоқда. Банкротлик жараёни бошланиши арафасида эса корхонада қарийб 120 нафар киши меҳнат қилган.

Хабарда айтилишича, ўзбекистонлик инвестор Гроссшёнау ҳамда Чехиянинг Фридлант шаҳридаги иш ўринларини сақлаб қолиш, шунингдек, юз йилдан зиёд тарихга эга дамашк тўқимачилиги анъаналарини давом эттириш ниятида. Корхона, жумладан, дастурхонлар, шунингдек, самолёт ва поездлар учун ўриндиқ қопламалари ишлаб чиқаради.

Мутахассислар фикрича, мазкур ташаббус амалий натижа берган тақдирда, у Германиядаги тарихий саноат корхонасини сақлаб қолиш билан бир қаторда, Ўзбекистон сармоядорларининг Европа бозоридаги иштирокини янада кенгайтиришга хизмат қилади.