ҚОҲИРА, 17 август. /“Дунё” АА/. Мисрда АҚШ президентининг махсус вакили Жаред Кушнер ҲАМАС раҳбарияти вакиллари билан учрашиб, агар ҳаракат Исроилдан тегишли чораларни кутаётган бўлса, қуролсизланиш бўйича амалий қадамлар ташлашини талаб қилди, деб хабар бермоқда “Дунё” АА мухбири.

Учрашув Ғазо сектори учун тинчлик режасини амалга ошириш доирасида бўлиб ўтди ва тахминан 90 дақиқа давом этди. “Axios” порталининг маълум қилишича, суҳбат ҲАМАСнинг ўз зиммасига олган мажбуриятларни бажариши йўлидаги муҳим қадамларни таъминлаш нуқтаи назаридан “жуда самарали” кечган.

Фаластин ҳаракати вакиллари махсус элчидан Дональд Трампга келишувларга содиқ қолишини етказишни сўради. Бунга жавобан Америка томони “фақат сўзларни эмас, балки аниқ ҳаракатларни кутаётганини” маълум қилди.

Жаред Кушнернинг таъкидлашича, агар ҲАМАС Исроилнинг ҳам тегишли мажбуриятларни бажаришини истаса, у қуролсизланиш бўйича амалий қадамлар ташлаши шарт. Хусусан, Ғазони бошқариш ваколатларини Фаластин технократлар ҳукуматига топшириш ва ҲАМАСнинг келажакда секторни бошқаришда иштирок этмаслигини кафолатлаш ҳақида сўз бормоқда.

Учрашувда “Тинчлик кенгаши”нинг юқори мартабали вакили Николай Младенов, Буюк Британиянинг собиқ бош вазири Тони Блэр, кенгашнинг катта маслаҳатчилари Аре Лайтстоун ва Лиран Танкман қатнашди. ҲАМАС томонидан ҳаракат етакчиси Халил ал-Хайя иштирок этди. Музокараларда Миср Умумий разведка хизмати раҳбари Ҳасан Рашад, қатарлик ва туркиялик дипломатлар ҳам қатнашди.

Учрашувдан сўнг ҲАМАС Дональд Трамп режасининг иккинчи босқичи бўлган “йўл харитаси”га, яъни доимий ўт очишни тўхтатиш, Исроил кучларини Ғазодан тўлиқ олиб чиқиш, гуманитар ёрдамни давом эттириш ва секторни тиклашни бошлашга розилигини эълон қилди. Шу билан бирга, баёнотда қуролсизланиш ҳақида алоҳида сўз юритилмаган.

Бугун Жаред Кушнернинг Исроилга ташриф буюриши ва Исроил томонининг тегишли қадамларини муҳокама қилиш учун Бош вазир Биньямин Нетаньяху билан учрашиши кутилмоқда. Аввалроқ Исроил бош вазири ҲАМАС тўлиқ қуролсизланмагунча Исроил ўз қўшинларини олиб чиқмаслигини айтган эди.

“Ахиос” маълумотларига кўра, агар ҳаракат қуролсизланишни бошласа, Исроилнинг жавоб чоралари Халқаро барқарорлаштириш кучларини Ғазога киритиш, Рафаҳ ҳудудида тиклаш ишларини бошлаш, Исроил қўшинларининг дастлабки олиб чиқилишини муҳокама қилиш ҳамда секторга гуманитар ёрдамни тезлаштиришни ўз ичига олиши мумкин.

Эслатиб ўтамиз, Ғазода мустаҳкам тинчликка эришиш мақсадида Президент Дональд Трамп ташаббуси билан “Тинчлик кенгаши” тузилган. Кенгаш низоми 2026 йил 22 январда Давосдаги Жаҳон иқтисодий форуми доирасида имзоланган. Биринчи йиғилиш 19 февраль куни Вашингтонда бўлиб ўтди. Унда Ўзбекистон Президенти Шавкат Мирзиёев иштирок этиб, нутқ сўзлаган.

“AFP” агентлиги сурати