РИМ, 18 сентябрь. /“Дунё” АА/. Ўзбекистон элчиси Абат Файзуллаев Италиянинг энг қадимий шаҳарларидан бири бўлмиш Сиена мэри Николетта Фабио билан учрашув ўтказди, деб хабар бермоқда “Дунё” АА мухбири.

Учрашувда Сиена ва Бухоро ўртасида биродарлик алоқаларини ўрнатиш истиқболлари муҳокама қилинди.

Шаҳар мэри ушбу ҳамкорлик кегусида иқтисодий, маданий ва томонларни қизиқтирган бошқа соҳаларда узоқ муддатли дўстона муносабатларни ривожлантириш учун мустаҳкам асос яратишини таъкидлади.

Николетта Фабио шаҳар ҳақида тўхталиб, XIII–XIV асрларда Сиена кучли мустақил ҳудудий тузилма бўлганини қайд этди. Бугунги кунда шаҳар туристик ва маданий марказ, хусусан, Пьяцца-дель-Кампо майдони ҳамда анъанавий Палио-ди-Сиена от чоптириш мусобақалари билан машҳур. Шаҳарнинг тарихий маркази ЮНЕСКОнинг Бутунжаҳон мероси рўйхатига киритилган.

Мэрнинг сўзларига кўра, Сиена иқтисодиёти асосан туризм, қишлоқ хўжалиги, хусусан узумчилик ва виночилик, шунингдек, Сиена университети томонидан тақдим этиладиган таълим соҳасига таянади.

Учрашув давомида Сиена мэри Ўзбекистонга ташриф буюришдан манфаатдор эканини билдириб, яқин муддатда шаҳар администрациясининг мамлакатимизга ташрифини ташкил этиш ниятида эканини маълум қилди.

Ташриф доирасида маҳаллий ҳокимият органлари раҳбарияти билан Сиена ва Бухоро ўртасида ҳамкорлик ўрнатиш тўғрисидаги тегишли ҳужжат лойиҳасини имзолаш масалаларини муҳокама қилиш режалаштирилмоқда.

Шаҳарлар ўртасида биродарлик алоқаларини ўрнатиш бўйича тегишли ишларни давом эттириш юзасидан келишувга эришилди.