ТОШКЕНТ, 24 июль. /“Дунё” АА/. Ташқи ишлар вазири Бахтиёр Саидов Чўлпонота шаҳрида Қозоғистон ташқи ишлар вазири Ермек Кошербаев билан учрашди, деб хабар бермоқда “Дунё” АА мухбири.

“Қозоғистон ташқи ишлар вазири Ермек Кошербаев жаноблари билан учрашишдан мамнунмиз, – деб ёзди Ўзбекистон ТИВ раҳбари ўзининг telegram-каналида. – Ўзбекистон ва Қозоғистон ўртасидаги стратегик шериклик ва иттифоқчилик муносабатларининг бугунги юксак даражаси алоҳида қайд этилди. Давлатларимиз раҳбарлари ўртасидаги яқин ва ишончли мулоқот барча йўналишлардаги ҳамкорлигимизни изчил ривожлантириш учун мустаҳкам асос яратмоқда.

Икки томонлама кун тартибидаги долзарб масалаларни муҳокама қилиб, олий даражада эришилган келишувларни ўз вақтида ва сифатли амалга ошириш муҳимлигини таъкидланди.

Шунингдек, ШҲТ доирасидаги ҳамкорлигимиз ҳамда долзарб минтақавий ва халқаро масалалар юзасидан фикр алмашдик”.