МИНСК, 28 июль. /“Дунё” АА/. Ўзбекистон элчиси Нуриддин Мамажонов бугун Беларусь Президенти Александр Лукашенкога ишонч ёрлиқларини топширди, деб хабар бермоқда “Дунё” АА мухбири.

Маросимда Ўзбекистон элчиси билан бир қаторда Бразилия, Перу, Мўғулистон, Жанубий Корея, Мьянма, Саудия Арабистони, Ливия ва Руанданинг янги тайинланган элчилари ҳам иштирок этди.

Александр Лукашенко дипломатик миссияларнинг янги раҳбарларига мурожаат қилар экан, Ўзбекистоннинг Марказий Осиёдаги ўрнини алоҳида таъкидлади. У Ўзбекистон Президентининг ўтган ойда Беларусга амалга оширган тарихий ташрифи икки томонлама муносабатларни стратегик шериклик даражасига олиб чиққани ҳамда икки давлат ўртасидаги ҳамкорлик ривожининг янги босқичини бошлаб берганини қайд этди.

Суҳбат чоғида Беларусь етакчисига Ўзбекистон Президенти Шавкат Мирзиёевнинг самимий саломи ва чуқур ҳурмат-эҳтироми етказилди.

Бундан ташқари, дипломатлар билан қисқа мулоқот чоғида Беларусь Президенти Ўзбекистон билан ҳамкорлиги мавзусига бир неча бор тўхталиб ўтди. У икки мамлакат ўртасидаги савдо-сармоявий лойиҳалар фаоллашганини қайд этиб, Ўзбекистон Президенти билан очиқ, ишончли ва дўстона муносабатлари туфайли икки томонлама алоқалар янги суръат ва прагматик тус олганини таъкидлади.

Маросим вақтида элчиларга ҳамроҳлик қилган Беларусь ташқи ишлар вазири Максим Риженков Президент Александр Лукашенкога Ўзбекистон билан эришилган келишувлар ижросини жадаллаштириш чоралари кўрилаётганини маълум қилди.