ЧУНЦИН, 19 июль. /“Дунё” АА/. Хитойнинг жануби-ғарбидаги Чунцин шаҳрида кучли ёғингарчилик сабабли юз берган ер кўчкиси оқибатида саккиз киши ҳалок бўлди, яна 34 киши бедарак йўқолган, деб хабар бермоқда “Дунё” АА мухбири “Синьхуа” ахборот агентлигига таяниб.

Маҳаллий ҳокимият органларининг маълумотларига кўра, қутқарув гуруҳлари вайроналар остидан 10 кишини соғ-саломат олиб чиқишга муваффақ бўлган. Қидирув-қутқарув ишлари давом эттирилмоқда.

Табиий офат жума куни эрталаб Пэншуй-Мяо ва Туцзя мухтор уездида жойлашган Ханьцзя шаҳарчасида содир бўлган. Кўчки остида 10 дан ортиқ турар жой биноси қолиб кетган. Баъзи аҳоли вакиллари вайроналар остида тириклайин қолиб кетган, бошқаларининг тақдири эса ҳозирча номаълумлигича қолмоқда.

Фожиага жавобан Хитой Фавқулодда вазиятлар вазирлиги геологик офатлар бўйича II даражали фавқулодда чора кўриш тизимини ишга туширди ва жабрланган ҳудудда қутқарув ишларини мувофиқлаштириш учун махсус тезкор гуруҳни сафарбар этди.

Эвакуация ва қутқарув ишларига кўмаклашиш учун мамлакатнинг давлат муҳандислик-қутқарув корпорацияси ҳисобланган “China Anneng Construction Group” жалб қилинган. Офат ҳудудига 110 нафар мутахассис, жумладан, муҳандислар ва геологлар, шунингдек, 50 та махсус қидирув-қутқарув техникаси юборилди.

Бундан ташқари, Чунцин шаҳрининг саккизта ўт ўчириш ва қутқарув қисмларидан 400 дан ортиқ ходим, шунингдек, алоқа ҳамда тиббий ёрдам гуруҳлари операцияда фаол иштирок этмоқда.