ИСЛОМОБОД, 30 сентябрь. /“Дунё” АА/. Ўзбекистоннинг Покистондаги элчиси Алишер Тўхтаев “Nishat Group” компанияси бош директори Муҳаммад Манша билан видеоконференция ўтказди, деб хабар бермоқда “Дунё” АА мухбири.

Суҳбат чоғида Ўзбекистонда меҳмонхона бизнеси, тўқимачилик саноати, озиқ-овқат маҳсулотларини қайта ишлаш, ислом молияси ва бошқа тармоқларда инвестиция лойиҳаларини амалга ошириш, истиқболли ва ўзаро манфаатли ҳамкорликнинг янги йўналишлари муҳокама қилинди.

“Компаниямиз меҳмонхона бизнесини юритиш бўйича халқаро тажрибага эга. Лаҳор ва Лондон шаҳарларида меҳмонхоналаримиз мавжуд. Жорий йилнинг ноябрь ойида Исломобод шаҳрида янги меҳмонхона ишга туширилади. Ўзбекистонда сайёҳлик ривожлангани ва меҳмонхоналарга бўлган юқори талабни эътиборга олиб, ушбу соҳада инвестиция лойиҳасини амалга ошириш биз учун манфаатли бўлади”, – деди Муҳаммад Манша.

“Nishat Group” вакиллари Ўзбекистонда исломий банк ташкил этиш имкониятларини ҳам ўрганишга қизиқиш билдирди. Компания томонидан Покистонда исломий банкинг соҳасида катта амалий тажриба тўплангани қайд этилиб, Ўзбекистонда амалдаги қонунчилик ва лицензиялаш талабларидан келиб чиққан ҳолда алоҳида исломий банк ташкил этиш, маҳаллий ҳамкорлар билан қўшма банк лойиҳасини амалга ошириш имкониятлари кўриб чиқилиши маълум қилинди.

Музокаралар давомида компания раҳбарияти ва мутахассисларидан иборат делегациянинг Ўзбекистонга сафарини ташкил этишга келишиб олинди.

“Nishat Group” Покистоннинг энг йирик бизнес гуруҳларидан бири бўлиб, тўқимачилик, банк-молия хизматлари, қурилиш материаллари, суғурта, энергетика, меҳмонхона бизнеси, кўчмас мулк, қишлоқ хўжалиги, автомобилсозлик ҳамда авиация каби йўналишларни қамраб олади.

Гуруҳ таркибига “Nishat Mills Limited”, “MCB Bank Limited”, “MCB Islamic Bank Limited”, “D.G. Khan Cement Company Limited”, “Adamjee Insurance”, “Nishat Power Limited”, “Nishat Hotels and Properties”, “Nishat Dairy”, “Hyundai Nishat Motor” каби йирик компаниялар киради.