ИСЛОМОБОД, 18 февраль. /“Дунё” АА/. Покистон оммавий ахборот воситалари Ўзбекистон Президенти Шавкат Мирзиёевнинг Тинчлик кенгашининг биринчи саммити иштирокига катта эътибор қаратмоқда, деб хабар бермоқда “Дунё” АА мухбири.

Хусусан, ушбу мамлакатнинг “Daily Ittehad”, “Islamabad Post”, “Daily Sub News”, “Сentreline”, “DNА News”, “Diplomatic Affairs”, “MNN News”, “The World News”, “Media Оnline Today”, “Diplomats World”, “News Network Pakistan”, “Sub News” каби етакчи нашрларида Ўзбекистон етакчисининг Тинчлик кенгашидаги иштироки юзасидан турли мақолалар эълон қилинди.

Чоп этилган мақолаларда Ўзбекистон Президенти Шавкат Мирзиёев 17–19 февраль кунлари АҚШга ташриф буюриб, мулоқотни ривожлантириш ҳамда долзарб глобал ва минтақавий можароларни тинч йўл билан ҳал этиш учун кўп томонлама платформа сифатида ташкил этилган янги халқаро тузилма – Тинчлик кенгашининг биринчи саммитида иштирок этиши маълум қилинган.

Таъкидланганидек, 2026 йил январь ойида Давосда бўлиб ўтган Жаҳон иқтисодий форумида Тинчлик кенгаши таъсис шартномасини имзолаш маросими бўлиб ўтди. Унда давлатлар, ҳукуматлар раҳбарлари ва бир қатор таъсисчи мамлакатлар вакиллари иштирок этди.

“Йил бошида илгари сурилган ушбу ташаббус қатор давлатлар, жумладан, Кенгаш таъсисчилари қаторига кирган Ўзбекистон томонидан қўллаб-қувватланиб, тинч дипломатия, кўп томонлама ҳамкорлик ва халқаро барқарорликни сақлаш учун масъулият тамойилларига содиқлигини тасдиқлади. Ўзбекистоннинг ушбу тузилмани таъсис этишдаги иштироки Тошкентнинг мулоқот, халқаро ҳуқуқни ҳурмат қилиш ва куч сценарийларига йўл қўймаслик ғояларини илгари суришга қаратилган изчил ташқи сиёсатини акс эттиради”, – дейилган материалларда.

Қайд этилишича, Ўзбекистон Президентининг Тинчлик кенгашининг биринчи саммитида иштирок этиши сўнгги пайтларда кузатилаётган Ўзбекистон – АҚШ сиёсий мулоқотининг фаоллашувига ҳамоҳангдир. Ўтган ярим йил ичида расмий Тошкент ва Вашингтон ўртасидаги олий даражадаги мулоқотлар сезиларли даражада фаоллашди. Бу икки томонлама муносабатларнинг сифат жиҳатидан янги босқичидан далолат беради.

Хусусан, ўтган йил сентябрь ойида Ўзбекистон Президенти БМТ Бош Ассамблеясининг навбатдаги сессиясида иштирок этиш учун Нью-Йорк шаҳрига ташриф буюрди. Унда давлат раҳбарлари ва халқаро ташкилотлар етакчилари билан учрашувлар ўтказилди, глобал ва минтақавий аҳамиятга молик долзарб масалалар муҳокама қилинди.

Мулоқот 2025 йил ноябрь ойи бошида Ўзбекистон Президентининг Қўшма Штатларга амалий ташрифи чоғида янада ривожланди. Тошкент ва Вашингтон ўртасидаги алоқалар турли форматларда, жумладан, телефон орқали мулоқотлар ва тегишли идоралар ўртасидаги ҳамкорликда қўллаб-қувватланди.

“Шу нуқтаи назардан, Ўзбекистоннинг Тинчлик кенгашидаги иштироки мамлакатнинг халқаро нуфузи ортиб бораётгани ва унинг глобал жараёнлардаги конструктив роли эътироф этилаётгани ифодаси сифатида баҳоланмоқда”, – деб ёзган Покистон ОАВ.