ВАРШАВА, 12 июнь. /“Дунё” АА/. Польшанинг “Makarony Babuni” компанияси раҳбари Ричард Качоровский бошчилигидаги бизнес-миссияси Ўзбекистонда бўлди, деб хабар бермоқда “Дунё” АА мухбири.

Дастур доирасида делегация Инвестициялар, саноат ва савдо вазирлиги, Савдо-саноат палатаси, Иқтисодий ҳамкорлик миллий ассоциацияси, Жиззах вилояти ҳокимлиги, “Жиззах” эркин иқтисодий зонаси вакиллари ва ўзбекистонлик тадбиркорлар билан учрашувлар ўтказди.

Шунингдек, Жиззах ва Сирдарё вилоятларида инвестиция лойиҳаларини амалга ошириш учун тайёр инфратузилмага эга саноат майдонлари кўздан кечирилди.

Ташриф якунлари бўйича мамлакатимизда макарон маҳсулотлари ишлаб чиқариш бўйича инвестиция лойиҳасини амалга ошириш, функционал ёдланган унни Польшага экспорт қилиш ҳамда компаниянинг Польшадаги корхоналарига Ўзбекистондан ишчи кучи жалб қилиш юзасидан келишиб олинди.