СИЭТЛ, 31 октябрь. /“Дунё” АА/. АҚШлик икки карра Паралимпиада совриндори Тейлор Свонсон 2027 йилда Ўзбекистонда бўлиб ўтадиган пара енгил атлетика бўйича жаҳон чемпионатида қатнашиш ниятида эканини маълум қилди, деб хабар бермоқда “Дунё” АА мухбири.

Спортчининг Ўзбекистоннинг Сиэтл шаҳридаги Бош консуллиги орқали йўллаган видеомурожаатида мамлакатимизда ўтказиладиган мусобақада иштирок этиш истаги ва халқаро спорт анжуманларининг параспортни ривожлантиришдаги аҳамияти ҳақида сўз боради.

“Ўзбекистонда мусобақада иштирок этиш мен учун жуда муҳим. Бу спортдаги фаолиятим ва ўзимга бўлган ишончимни оширишда, шунингдек, бу мамлакат ҳақидаги тасаввурларни янада кенгайтиришда катта аҳамият касб этади ”, – деди спортчи.

Унинг сўзларига кўра, параспорт бўйича халқаро мусобақалар имконияти чекланган ва соғлиғида муаммолари бўлган инсонларга ўз кучига ишонч бағишлаб, янги марраларни забт этиш ва салоҳиятини юзага чиқаришга кўмаклашади.

Америкалик спортчи ўзбекистонлик мухлисларнинг қўллаб-қувватлашига умид билдириб, Ўзбекистонда параспортчилар учун яратилган шароитлар ҳамда кўрсатилаётган давлат кўмаги ҳақида халқаро ҳамжамиятга сўзлаб беришни исташини таъкидлади.

Чемпионатнинг 2027 йилда — Лос-Анжелес-2028 Паралимпия ўйинлари арафасида ўтказилиши мусобақанинг аҳамиятини янада оширади. Унинг фикрича, мазкур турнир дунёнинг етакчи параспортчилари ўз тайёргарлик даражасини кўрсатадиган, Ўзбекистон эса ўз спорт салоҳиятини халқаро майдонда яққол намоён этадиган нуфузли майдонга айланади.

Тейлор Свонсон параспринт билан 2022 йилда шуғуллана бошлаган. Париж-2024 Паралимпия ўйинларида у 100 метрга югуриш баҳсларида кумуш ва универсал эстафетада бронза медалини қўлга киритган. Ўзбекистон терма жамоаси ҳам Париждаги Паралимпиадада тарихий натижа кўрсатиб, 26 та медаль (10 та олтин, 9 та кумуш ва 7 та бронза) билан умумжамоа ҳисобида 13-ўринни эгаллаган эди.