ТОШКЕНТ, 31 октябрь. /“Дунё” АА/. Кеча Ўзбекистон Президенти Администрацияси раҳбари Саида Мирзиёева “Заковат-Гамбит” бешинчи шахмат турнири ғолибларини тақдирлаш маросимида иштирок этди, деб хабар бермоқда “Дунё” АА мухбири.

 “Мамлакатнинг интеллектуал салоҳияти нафақат истеъдод эгаларининг ютуқлари, балки ҳар бир инсоннинг қобилиятини юзага чиқариш учун яратиладиган имкониятлар кўлами билан ҳам белгиланади, – деб ёзди бугун Ўзбекистон Президенти Администрацияси раҳбари Саида Мирзиёева ўзининг telegram-каналида. – Кеча бешинчи бор ўтказилган “Заковат-Гамбит” шахмат турнири ғолибларини тақдирладик. Бу йилги мусобақа 6 мингга яқин иштирокчини бирлаштирди, бу ўтган йилги кўрсаткичдан икки баробар кўп. Уларнинг 633 нафарини аёл ва қизларимиз ташкил этди. Бу рақамлар замирида интеллектуал беллашувларга бўлган қизиқишнинг ортиб бораётгани, илмга интилиш ҳамда ёшларимизнинг ўз кучи ва имкониятларига бўлган ишончи мужассам.

Ўзбекистон халқаро шахмат майдонида ҳавас қилгулик натижаларга эришиб келмоқда. Бироқ бунданда муҳим яна бир омил бор: юртимизда ҳар бир инсоннинг ақлий салоҳиятини тўлиқ намоён этишга хизмат қилувчи муҳит шаклланмоқда.

“Заковат” лойиҳасининг алоҳида аҳамиятини мен айнан шунда кўраман. Бу лойиҳа иқтидорли ёшларни кашф этибгина қолмай, балки тафаккур маданиятини, мустақил фикрлаш ва оқилона қарорлар қабул қилиш кўникмасини шакллантиришга ҳам хизмат қилмоқда. Зеро, юртимиз келажаги ёш авлоднинг нафақат қанчалик билимли эканига, балки шу билимларни қай даражада қўллай олиши ва фикр доирасига ҳам боғлиқ”.