ТОШКЕНТ, 24 февраль. /“Дунё” АА/. 1 мартдан Грузияда Меҳнат миграцияси тўғрисидаги қонунга киритилган ўзгартиришлар кучга киради, деб хабар бермоқда “Дунё” АА мухбири.

Хитойнинг “Sinxua” ахборот агентлиги маълумотига кўра, бу ҳақда 23 февраль куни Бандлик, ҳудудлардан кўчирилган шахслар, меҳнат, соғлиқни сақлаш ва ижтимоий таъминот вазирлиги маълум қилган.

Қонундаги ўзгартиришларга кўра, эндиликда чет эл фуқаролари Грузияда қонуний ишга жойлашиш, шу жумладан масофадан ишлаши учун махсус рухсатнома олиши керак.

“Ишлаш учун рухсатномалар Бандликка кўмаклашиш давлат агентлиги орқали берилади. Жараён тўлиқ электрон шаклда бўлиб, рўйхатга олиш портали 1 мартдан очилади, рухсатнома олиш бепул. Меҳнат фаолияти учун рухсатнома аниқ лавозим ва аниқ иш берувчига 1 йил муддатга берилади”, - дея аниқлик киритган вазирлик.