ТОШКЕНТ, 6 июль. /“Дунё” АА/. “ОПЕК+” келишувининг етти иштирокчи давлати, жумладан, Қозоғистон Ироқнинг нефть қазиб олиш квотасини оширишга доир чақириғидан сўнг август ойидан қазиб олиш ҳажмини суткасига 188 минг баррелга оширишга қарор қилди, деб хабар бермоқда “Дунё” АА мухбири “Al Jazeera” телеканалига таяниб.

Тегишли қарор жаҳон нефть бозори ҳолати ва истиқболларини баҳолашга бағишланган онлайн йиғилиш якунларига кўра қабул қилинди.

Қазиб олиш ҳажмини оширишда Саудия Арабистони, Россия, Ироқ, Қувайт, Қозоғистон, Жазоир ва Ўмон иштирок этади. Бу “ОПЕК+”га аъзо мамлакатлари томонидан 2023 йилда жорий этилган ихтиёрий чекловларни босқичма-босқич бекор қилишни давом эттираётган қаторасига бешинчи ойлик ўсишдир.

Альянснинг расмий баёнотида таъкидланишича, иштирокчилар жаҳон бозоридаги вазиятни диққат билан кузатмоқда ва зарурат туғилганда қазиб олиш ҳажмини янада ошириш, тўхтатиб туриш ёки бекор қилиш чораларини кўради. Ихтиёрий чекловларда қатнашаётган мамлакатларнинг навбатдаги йиғилиши 2 августга режалаштирилган.

Бу қарор Эрон атрофидаги можародан сўнг жаҳон нефть бозорининг аста-секин барқарорлашуви фонида қабул қилинди. Баҳорда нефть котировкаларининг кескин ўсишидан кейин нархлар ҳарбий ҳаракатлар бошланишидан олдин кузатилган даражага қайтди. Бунга зиддиятнинг узоқ муддатда пасайиши ва Ҳўрмуз бўғози орқали кема қатновининг тикланиши кутилаётгани замин яратди.

Шу билан бирга, таҳлилчилар қазиб олиш ҳажмининг янгидан оширилиши бозорга амалда чекланган таъсир кўрсатиши мумкинлигини қайд этмоқда. Сўнгги ойларда Ҳўрмуз бўғози орқали ташишдаги узилишлар туфайли нефть экспорти чекланиб қолганди. Шу сабабли етказиб беришнинг реал ҳажмлари тасдиқланган квоталардан сезиларли даражада фарқ қилган. Кема қатнови тиклангани сари нефть таклифи аста-секин ортиб, жаҳон нархларига босим ўтказмоқда.

Шу фонда “ОПЕК+” доирасида альянснинг келгуси ҳамкорлиги юзасидан саволлар сақланиб қолмоқда. Май ойидан БАА бу қарорини мустақил равишда қазиб олишни кўпайтириш истаги билан изоҳлаб, “ОПЕК+” келишувидан чиққан эди. Айни вақтда Ироқ амалдаги квоталар тизимидан норозилигини билдириб ва нефть экспортини оширишга интилиб, чекловлар механизмидан чиқиш имкониятини кўриб чиқаётган эди. Бағдод бу масала бўйича ҳали расмий қарор қабул қилгани йўқ.

“Bloomberg” АА сурати