ТОШКЕНТ, 6 июль. /“Дунё” АА/. Президент Шавкат Мирзиёев бугун нефть-газ тармоғида навбатдаги куз-қиш мавсумига тайёргарлик ишларининг бориши юзасидан ахборот билан танишди, деб хабар бермоқда “Дунё” АА мухбири.

Давлатимиз раҳбари матбуот хизмати маълумотига кўра, 2026-2027 йиллар куз-қиш мавсумида аҳоли, ижтимоий соҳа объектлари ва иқтисодиёт тармоқларини энергия ресурслари билан барқарор таъминлаш мақсадида ишлаб чиқилган комплекс чора-тадбирлар кўриб чиқилди. Табиий ва суюлтирилган газ етказиб бериш, магистрал ва ҳудудий газ тармоқларини таъмирлаш, ёқилғи захираларини шакллантириш ҳамда авария-тиклаш бригадаларининг шайлигини таъминлаш бўйича аниқ вазифалар қўйилди.

Табиий газ таъминоти тизимини мавсумга тайёрлаш ишларига алоҳида эътибор қаратилди. Жумладан, мавсумгача магистрал газ қувурларининг 53,7 километр нуқсонли қисмини алмаштириш, компрессор станцияларидаги 77 та газ ҳайдаш агрегатини мукаммал таъмирлаш режалаштирилган.

Шунингдек, 881 та маҳалладаги 220 минг хонадоннинг газ таъминотини яхшилаш ва технологик йўқотишларни қисқартириш мақсадида уч босқичли тақсимлаш тизимидан икки босқичли тизимга ўтказиш кўзда тутилган. 711,9 километр газ тармоғи ва 400 та газ тақсимлаш пункти мукаммал таъмирланади ҳамда реконструкция қилинади.

Аҳоли ва ижтимоий соҳа объектларини суюлтирилган газ билан таъминлаш масаласи ҳам кўриб чиқилди. Куз-қиш мавсумида 325,7 минг тонна суюлтирилган газ етказиб бериш, шу жумладан, бориш қийин бўлган 229 та қишлоқдаги 104,7 минг истеъмолчига 8,2 минг тонна суюлтирилган газ етказиш белгиланган.

Қиш даври учун ёқилғи захираларини шакллантириш бўйича ҳам чоралар кўрилмоқда. Жумладан, декабрь-январь ойлари учун 120 минг тонна автобензин захирасини яратиш режалаштирилган. Иссиқлик электр станцияларига мавсум давомида 4 миллион 161 минг тонна кўмир етказиб бериш прогноз қилинмоқда.

“Ўзбекнефтгаз” тизимидаги корхоналарда технологик барқарорликни таъминлаш мақсадида 90 та технологик қурилмада таъмирлаш ишлари амалга оширилади. Бу ишлаб чиқариш қувватларининг узлуксиз ишлаши, аҳоли ва иқтисодиёт тармоқларига энергия ресурсларини барқарор етказиб беришга хизмат қилади.

Тайёргарлик ишлари фақат нефть-газ тизими билан чекланмай, умумий энергетика ва коммунал соҳалар билан узвий боғлиқ ҳолда олиб бориш зарурлиги кўрсатиб ўтилди. Шу мақсадда республика ва ҳудудий комиссиялар фаолиятини йўлга қўйиб, мавсумга тайёргарлик ишларини мувофиқлаштириш ва доимий назорат қилиб бориш топширилди.

Мутасаддиларга белгиланган чора-тадбирлар ижросини қатъий назорат қилиш, мавсумга тайёргарлик ишларини муддатида ва сифатли якунлаш, аҳоли ҳамда ижтимоий соҳа объектларига табиий ва суюлтирилган газ, шунингдек, бошқа ёқилғи ресурсларини барқарор етказиб бериш бўйича тегишли топшириқлар берилди.