БЕЛГРАД, 13 сентябрь. /“Дунё” АА/. Сербиянинг RTS ахборот агентлиги Сербия ички ва ташқи савдо вазири Ягода Лазаревичнинг “Сербия – Ўзбекистон эркин савдо тўғрисидаги битимни тузишга тайёрланаётган биринчи Европа мамлакатидир” сарлавҳали интервьюсини эълон қилди, деб хабар бермоқда “Дунё” АА мухбири.

Суҳбатда Сербия ва Ўзбекистон эркин савдо тўғрисидаги битимни имзолашга олиб келадиган муҳим жараённи бошлашга тайёрлиги билдирилган.

Вазир Ягода Лазаревичнинг маълум қилишича, сўнгги бир йил ичида Сербия ва Ўзбекистон ўртасидаги иқтисодий ҳамкорлик жадал ривожланди.

Сербия Президенти Александр Вучичнинг ўтган йилнинг октябрь ойида Тошкентга амалга оширган ташрифидан тортиб, Ўзбекистон Президенти Шавкат Мирзиёевнинг ташрифигача бўлган даврда икки мамлакат ишбилармон доиралари ўртасида алоқаларни ўрнатиш мақсадида тўртта бизнес-форум ташкил этилди.

Вазирнинг сўзларига кўра, Жорий йилнинг биринчи ярмида Ўзбекистонда ЯИМ ўсиши 8,6 фоизни ташкил этди ва унинг иқтисодиёти Сербия билан юқори даражада бир-бирини тўлдирадиган қатор соҳаларда жадал ривожланмоқда.

Катта салоҳиятга эга соҳалардан бири қишлоқ хўжалиги бўлиб, у Ўзбекистон ЯИМнинг 17,3 фоизини шакллантиради. Сербия Ўзбекистон бозорига озиқ-овқат саноати ускуналари ва уруғлик материалларини экспорт қилмоқда.

Шунингдек, Сербия саноатини зарур хомашё билан таъминлаш ҳамда ўзбек бозорига серб маҳсулотларини етказиб бериш бўйича ҳамкорлик фаоллашмоқда.

Вазир текстиль соҳасида қўшма корхоналар ташкил этиш ва арзонроқ хомашёни Сербияда қайта ишлаш имкониятларига эътибор қаратди. Бундан ташқари, Ўзбекистондан ёнғоқ ва қуритилган мевалар импорти ички бозордаги нархларга ижобий таъсир кўрсатади. “Янги иш ўринларини яратиш ва янги бозорларнинг очилиши икки мамлакат компанияларига учинчи бозорларга биргаликда чиқиш имконини беради”, — деди Ягода Лазаревич.