ИСЛОМОБОД, 21 февраль. /“Дунё” АА/. Покистоннинг «The world News» электрон нашри Ўзбекистон Президентининг 17-19 февраль кунлари Америка Қўшма Штатлари пойтахти Вашингтонга бўлиб ўтган амалий ташрифини кенг ёритди, деб хабар қилмоқда “Дунё” АА мухбири.

Жумладан, ушбу электрон нашр Ўзбекистон Президенти Шавкат Мирзиёевнинг Вашингтон шаҳрида бўлиб ўтган Тинчлик кенгашининг биринчи саммитидаги нутқини тўлиқ эълон қилди.

Нутқда Президент Шавкат Мирзиёев Ўзбекистон Тинчлик кенгашини тузиш бўйича тинчликсевар ташаббусни қўллаб-қувватлаганини ва унинг муваффақиятли амалга оширилиши борасида ўзининг амалий иштирокини қатъий баён этгани таъкидланган.

«Ишончим комил, Кенгаш иши Ғазо минтақасини иқтисодий ва ижтимоий қайта тиклаш учун қулай шароит яратишга имкон беради. Шу билан бирга, Ғазонинг ҳар қандай ташқи бошқарув механизми сектор аҳолисининг сўзсиз ички қўллаб-қувватлашига таяниши лозим. Барча томонларнинг мувофиқлаштирилган саъй-ҳаракатлари Ғазони тез фурсатда қайта тиклаш учун зарур шарт-шароитларни яратишга, можародан кейинги жараёнларни барқарорлаштиришга хизмат қилади.

Таъкидлаб айтаманки, Ўзбекистон ушбу ҳудудда турар жойлар, болалар боғчалари, мактаб ва касалхоналар барпо этишга имкон қадар ҳисса қўшишга тайёр», – дея Ўзбекистон Президенти нутқидан иқтибос келтирилган материалда.

Шунингдек, «The world News» Ўзбекистон Президенти Шавкат Мирзиёев Вашингтон шаҳрига ташрифнинг ишбилармонлик дастури доирасида икки томонлама ҳужжатларни имзолашга бағишланган маросим ва қўшма лойиҳалар тақдимотида иштирок этгани ҳақида ёзди.

Давлат раҳбари мазкур тадбирдаги нутқида янги, амалий форматда ўтаётган ушбу учрашув бундан аввалги давра суҳбатининг мантиқий давоми ҳамда иқтисодий шериклик стратегик ишонч ва ўзаро манфаатдорлик руҳида юксак даражага кўтарилаётганининг ифодаси эканини таъкидлади.

«Ўзбекистон етакчиси ҳузурида ёқилғи қуйиш шохобчалари тармоғини қуриш, ёмғирлатиб суғориш технологияларини жорий этиш, муҳим минералларни қазиб олиш ва етказиб бериш, паррандачилик кластерини ташкил этиш, агросаноат, молия бозорини ривожлантириш ҳамда инвестиция муҳитини яхшилаш бўйича икки томонлама ҳужжатлар имзоланди», – дея қайд этилган материалда.