ТOШКЕНТ, 23 декабрь. /“Дунё” AA/. Ўзбекистон ташқи ишлар вазири маслаҳатчиси Мунира Аминова кеча “Konrad Adenauer” номидаги жамғарманинг Марказий Осиё мамлакатлари бўйича минтақавий вакили Андре Альгермиссен билан учрашув ўтказди, деб хабар қилмоқда “Дунё” АА мухбири.

ТИВ маълумотига кўра, учрашув давомида томонлар иқтисодий ва яшил дипломатия соҳаларида ҳамкорлик истиқболлари юзасидан фикр алмашдилар. Сунъий интеллект, ижтимоий тармоқлар ҳамда ахборот ва медиа саводхонлиги масалаларига алоҳида эътибор қаратилди, шунингдек, қўшма таълим ва тадқиқот лойиҳаларини амалга ошириш имкониятлари кўриб чиқилди.

Германия томони “Дунё” ахборот агентлигини қўшма лойиҳаларни амалга оширишда иштирок этишга таклиф қилди.

Учрашув иштирокчилари ҳамкорликни мустаҳкамлашдан умумий манфаатдорлик билдирдилар ҳамда қўшма фаолиятни янада ривожлантиришга тайёр эканликларини тасдиқладилар.