ВАРШАВА, 21 июнь. /“Дунё” АА/. Польшанинг “Kurier Kolejowy” электрон порталида Польша–Ўзбекистон иқтисодий ҳамкорлигига бағишланган мақола эълон қилинди, деб хабар бермоқда “Дунё” АА мухбири.

Нашрда қайд этилишича, 10 июнь куни бўлиб ўтган Польша–Ўзбекистон ҳамкорлик форуми доирасида Польша–Осиё савдо-саноат палатаси ҳамда Ўзбекистон Вазирлар Маҳкамаси ҳузуридаги Енгил саноатни ривожлантириш агентлиги ўртасида келишув имзоланган.

Мазкур ҳужжат савдо-иқтисодий ва инвестициявий ҳамкорликни чуқурлаштиришга, шунингдек, икки мамлакат бизнес тузилмалари ва давлат идоралари ўртасида ҳамкорликнинг барқарор механизмларини яратишга қаратилган.

Келишувда ўқув дастурлари, семинарлар ва ишбилармонлик учрашувларини ўтказиш, шунингдек, саноат ишлаб чиқариши, инновациялар ва барқарор ривожланиш соҳаларида тажриба алмашиш орқали касбий компетенцияларни ривожлантириш назарда тутилган.

Бундан ташқари, ҳужжат қўшма тадқиқот ва тажриба-синов лойиҳаларини амалга ошириш, тадбиркорлар ўртасида ишбилармонлик алоқаларини ўрнатиш бўйича бизнес-миссиялар ва тадбирларни ташкил этишни кўзда тутади. Компанияларнинг янги экспорт бозорларига чиқиши ҳамда халқаро кўргазма ва форумларда иштирок этишига кўмаклашиш алоҳида йўналиш сифатида белгиланган.

Ташаббус доирасида технологик ҳамкорликни кенгайтириш, жумладан, ишлаб чиқариш, сифатни бошқариш ва инновацияларни жорий этиш соҳасида ноу-хау алмашиш ҳам кўзда тутилган. Шунингдек, тармоқ бирлашмалари, хусусан, “Ўзтўқимачиликсаноат” уюшмаси билан ҳамкорлик қилиш режалаштирилган.

Қайд этилишича, имзоланган меморандум икки мамлакат ишбилармон доиралари ўртасидаги амалий ҳамкорликни янада кенгайтиришга хизмат қилади.