СОЧИ, 28 июнь. /“Дунё” АА/. Сочида дунёнинг 53 мамлакатидан 700 нафардан ортиқ кинематограф иштирокида III “Евросиё-Кинофест” халқаро кинофестивали бўлиб ўтди, деб хабар бермоқда “Дунё” АА мухбири Россиянинг “Мир Новостей” нашрига таяниб.

Тўққиз кун давомида фестиваль намойишлари, ижодий учрашувлар ва ишбилармонлик тадбирларига 45 мингдан зиёд томошабин ташриф буюрди. Маданий ва миллий тафовутлардан қатъи назар, иштирокчиларни бирлаштирган оила, хотира, муҳаббат, хиёнат, адолат ва умид излаш каби мавзулар фестиваль фильмларининг марказида бўлди.

Фестивалнинг танлов дастурида ўзбекистонлик киноижодкорлар иккита соврин билан тақдирланди. Режиссёр Рашид Маликовнинг “Вата” картинаси “Энг яхши сценарий” учун совринни қўлга киритди. Аҳаджон Оҳуновнинг “Эрта очилган лола” фильми эса “Рус тилидаги энг яхши хорижий фильм” номинациясида махсус мукофотга сазовор бўлди.

Ташкилотчилар мазкур ютуқлар ўзбек кино санъатининг халқаро майдондаги нуфузи ва эътирофи тобора ортиб бораётганининг яна бир тасдиғи эканини таъкидлади.

Кино мутахассисларнинг қайд этишича, Сочи шаҳрида ўтказилган фестиваль маданият турли халқлар ўртасидаги мулоқот, ўзаро англашув ва дўстликни мустаҳкамлашга хизмат қилувчи муҳим кўприк эканини яна бир бор намоён этди.