ТОШКЕНТ, 10 август. /“Дунё” АА/. Йилнинг дастлабки 6 ойи давомида Ўзбекистонга ўқиш мақсадида 21 минг 42 нафар хориж фуқароси ташриф буюрди, деб хабар бермоқда “Дунё” АА мухбири.

Миллий статистика қўмитаси маълумотларига кўра, 2025 йилнинг мос даври билан солиштирганда мамлакатга ўқиш мақсадида келган хориж фуқаролари сони 11,5 минг кишига ёки 2,2 бараварга ошган.

Ўзбекистонга таълим олиш мақсадида келган хорижликларнинг энг кўп улуши Туркманистон фуқаролари ҳиссасига тўғри келди — 9207 киши.

Кейинги ўринлардан Ҳиндистон — 3723, Тожикистон — 1915, Хитой — 951, Қирғизистон — 834, Покистон — 689, Миср — 603, Жанубий Корея — 526, Филиппин — 367 ва АҚШ — 302 нафар фуқаро билан жой олган.

Бошқа мамлакатлардан Ўзбекистонга ўқиш мақсадида 1925 нафар хориж фуқароси келган.

Мутахассисларнинг таъкидлашича, хорижлик талабалар сонининг сезиларли даражада ошиши Ўзбекистоннинг таълим имкониятларига бўлган қизиқиш ортиб бораётганидан далолат беради.