БОКУ, 1 июль. /“Дунё” АА/. Озарбайжон пойтахти Боку шаҳридаги Ҳайдар Алиев марказида “Биринчи Туркология қурултойи: юз йиллик илмий ва маданий мерос” мавзусида халқаро конгресс бўлиб ўтди, деб хабар бермоқда “Дунё” АА мухбири.

Бундан роппа-роса бир аср муқаддам туркий халқлардан 131 нафар вакил иштирокида ташкил этилган илк тарихий қурултойнинг 100 йиллик юбилейи муносабати билан Озарбайжон Маданият вазирлиги томонидан “Туркий дунё ҳафталиги” эълон қилинди.

Мазкур ҳафталик доирасида уюштирилган халқаро анжуманнинг очилиш маросимида дунёнинг 20 дан ортиқ мамлакатидан келган 100 нафардан зиёд таниқли олимлар, туркологлар ва экспертлар қатнашди.

Мазкур тантанали маросимда Ўзбекистон маданият вазири Озодбек Назарбеков ҳам иштирок этди. Халқаро анжуманда Ўзбекистон Президенти Шавкат Мирзиёевнинг I Туркология қурултойининг 100 йиллигига бағишланган халқаро конгресс қатнашчиларига йўллаган қутлов мурожаати ўқиб эшиттирилди.

Давлатимиз раҳбари ўз мурожаатида юз йил аввал Бокуда бўлиб ўтган тарихий анжуманда 11 нафар фидойи ва таниқли ўзбек зиёлиси ҳам қатнашгани бугунги авлодлар томонидан ҳамиша фахр билан ёдга олинишини алоҳида таъкидлади. Шунингдек, Президент Шавкат Мирзиёев ушбу тарихий сана муносабати билан туркий давлатларнинг етакчи илмий марказлари ҳамкорлигида “Туркий дунё маърифатпарварлари” халқаро илмий-энциклопедик лойиҳасини яратиш ҳамда жадидчилик ҳаракати намояндаларининг барча асарлари ва архив ҳужжатлари жамланган ягона рақамли кутубхонани шакллантириш бўйича ғоят муҳим ташаббусларни илгари сурди.

Конгресснинг шўъба йиғилишларида ўзбекистонлик олимлар ўзларининг илмий маърузалари ва тадқиқот ишлари билан фаол иштирок этмоқда. Рамзий маънода, шўъба мажлисларидан бири бундан бир аср олдин Биринчи Туркология қурултойи бўлиб ўтган ва бугунги кунда Озарбайжон Миллий фанлар академияси жойлашган тарихий бинода ташкил этилди.

“Туркий дунё ҳафталиги” дастури доирасида анжуман иштирокчилари ва хорижлик меҳмонлар учун Озарбайжоннинг тарихий ҳудудлари — Ағдам, Шуша ва Хонкенди шаҳарларига танишув саёҳатлари уюштирилиши кўзда тутилган.