САМАРҚАНД, 24 март. /“Дунё” АА/. 23­–24 март кунлари Самарқанд шаҳридаги Алишер Навоий кўчасида “Шарқ таомлари” гастрономик фестивали бўлиб ўтмоқда, деб хабар бермоқда “Дунё” АА мухбири воқеа жойидан.

Фестиваль байрам шукуҳи ва дастурларга бой тарзда ўтди. Тадбир профессионал ошпазлар, рестораторлар ва пазандачилик санъати ихлосмандларини бирлаштириб, Шарқ ва жаҳон ошхоналарининг бой хилма-хиллигини тақдим этди.

Кун давомида фестиваль меҳмонлари миллий ва халқаро ошхоналарнинг энг сара таомларини татиб кўриб, уларнинг тайёрланиш жараёнини кузатишди. Анъанавий ва замонавий таомларни тайёрлаш сирларини амалий тарзда намойиш этган тажрибали ошпазларнинг маҳорат дарслари алоҳида қизиқиш уйғотди.

Меҳмонлар нафақат турли хил таомларни татиб кўриш, балки уларни тайёрлаш хусусиятлари, хизмат кўрсатиш маданияти ва турли халқларнинг пазандалик анъаналари билан танишиш имкониятига эга бўлди.

Бундай гастрономик фестивалларнинг ўтказилиши Самарқандга тадбир туризмини ривожлантириш, Ўзбекистон миллий таомларини халқаро майдонда оммалаштиришга хизмат қилди.

Минтақанинг энг қадимий маданий марказларидан бири бўлган шаҳар сайёҳлик ташаббусларини фаол равишда кенгайтирмоқда, жумладан, йирик ошпазлик тадбирларини ўтказмоқда.

“Шарқ таомлари” фестивали баҳор мавсумининг ёрқин воқеаси ва гастрономия саноати мутахассислари ўртасида тажриба алмашиш, шунингдек, сайёҳларни жалб қилиш учун муҳим майдонга айланди.