СЕУЛ, 22 октябрь. /“Дунё” АА/. Ўзбекистоннинг Жанубий Кореядаги элчихонаси томонидан мамлакатимиз мустақиллигининг 35 йиллиги ҳамда икки давлат ўртасида дипломатик муносабатлар ўрнатилганининг 34 йиллиги муносабати билан тантанали қабул маросими ташкил этилди, деб хабар бермоқда “Дунё” АА мухбири.

Сеулда бўлиб ўтган тадбирда Жанубий Корея ҳукумати, вазирлик ва идоралари, етакчи компаниялари, молия институтлари, ишбилармонлик ва сайёҳлик доиралари, дипломатик ваколатхоналар, халқаро ташкилотлар вакиллари, ушбу давлатда меҳнат қилаётган ҳамда таҳсил олаётган ватандошлар иштирок этди.

Ўзбекистон элчиси Алишер Абдусаломов мамлакатимизда амалга оширилаётган ислоҳотлар, иқтисодиётнинг ривожланиши ва кенгайиб бораётган инвестициявий имкониятлар ҳақида тўхталиб ўтди.

Дипломатимиз 2025 йил якунларига кўра, Ўзбекистон ялпи ички маҳсулоти 7,7 фоизга ўсганини, Жанубий Корея билан ҳамкорлик стратегик даражага кўтарилганини таъкидлади. Бугунги кунда мамлакатда корейс капитали иштирокидаги 700 дан ортиқ корхона фаолият юритмоқда.

Жанубий Корея ташқи ишлар вазири ўринбосари Чон Ий Хе Ўзбекистонни мустақиллик юбилейи билан табриклаб, мамлакатимизни Марказий Осиёдаги муҳим ҳамкори ва ишончли дўсти эканини алоҳида қайд этди.

Унинг сўзларига кўра, Президент Шавкат Мирзиёевнинг сентябрь ойида Сеулга амалга оширган давлат ташрифи ҳамкорликни кенгайтириш учун янги истиқболларни очди. “Марказий Осиё – Корея Республикаси” биринчи саммити савдо, инвестиция, саноат, транспорт, рақамлаштириш, илм-фан ва хавфсизлик соҳаларидаги алоқаларни ривожлантириш учун қўшимча замин яратди.

Корея–Ўзбекистон бизнес уюшмаси раиси Ким Ён Гу тадбиркорлар ўртасида тўғридан-тўғри алоқаларни кенгайтириш, делегациялар ташрифлари ва B2B форматидаги учрашувларни ташкил этиш, Корея технологиялари ва бошқарув тажрибасини жалб қилиш муҳимлигини таъкидлади.

У саноат, энергетика, инфратузилма, рақамли технологиялар, қишлоқ хўжалиги, соғлиқни сақлаш ва таълим соҳаларида қўшма лойиҳаларни амалга оширишга кўмаклашиш, Ўзбекистон маҳсулотларини Корея бозорига олиб чиқишга тайёрлигини билдирди.

“Hyundai Rotem” президенти Ли Ён Бе компания Ўзбекистон транспорт инфратузилмасини модернизация қилишда иштирок этаётганини маълум қилди. Амалдаги лойиҳа доирасида олтита замонавий тезюрар электропоезд етказиб берилиши кўзда тутилган. Улардан тўрттаси аллақачон келтирилган ва йўловчиларни ташимоқда, яна иккитасини эса 2026 йил охиригача етказиб бериш режалаштирилган.

“Korea District Heating Corporation” президенти Ха Дон Гин Фарғона ва Навоий вилоятларида биомассадан иссиқлик ва электр энергиясини биргаликда ишлаб чиқариш лойиҳалари устида иш олиб борилаётгани ҳақида сўз юритди. Унинг фикрича, ушбу ташаббуслар маҳаллий хомашёдан самаралироқ фойдаланиш, энергия таъминоти барқарорлигини ошириш ва атмосферага чиқариладиган зарарли ташламаларни камайтириш имконини беради.

“Shinhan Financial Group” раиси Чжин Ок Дон компания Ўзбекистонда “Shinhan Bank” филиалини ташкил этиш бўйича амалий ишларни олиб бораётганини билдирди. Зарур рухсатномаларни олиш жараёни якунлангач, филиалнинг очилиши 2027 йилнинг иккинчи ярмига мўлжалланган.

Тантанали қабул маросими доирасида Жанубий Кореяда истиқомат қилаётган ватандошлар иштирокида концерт дастури намойиш этилди. Меҳмонлар ўзбек миллий таомлари ҳамда Ўзбекистондан келтирилган сархил мевалардан татиб кўрди.