ТОКИО, 27 май. /“Дунё” АА/. Ўзбекистон элчиси Муҳсинхўжа Абдураҳмонов Япония Парламенти Вакиллар палатаси (қуйи) депутати Кэйжи Фуруя билан учрашди, деб хабар бермоқда “Дунё” АА мухбири.

Музокараларда Ўзбекистон-Япония муносабатларининг бугунги ҳолати ва истиқболлари, шунингдек, парламентлараро ҳамкорликни янада ривожлантириш масалалари атрофлича муҳокама қилинди.

Суҳбат чоғида япониялик депутат Ўзбекистон Президентининг 2025 йил декабрь ойида Японияга амалга оширган расмий ташрифи икки давлат муносабатларини янги босқичга олиб чиққанини алоҳида таъкидлади. Шу билан бирга, “Марказий Осиё + Япония” мулоқотининг биринчи олий даражадаги саммити Токионинг минтақа мамлакатлари билан кўп томонлама ҳамкорлигини мустаҳкамлаш учун муҳим асос яратгани қайд этилди.

Мулоқот давомида томонлар икки мамлакат ўртасидаги парламентлараро алоқалар изчил ривожланаётганини мамнуният билан тилга олдилар.

Бундан ташқари, учрашувда ҳудудлараро алоқаларни кенгайтириш, тиббиёт соҳасидаги самарали ҳамкорликни изчил давом эттириш ҳамда 2027 йилда икки давлат ўртасида дипломатик муносабатлар ўрнатилганининг 35 йиллиги муносабати билан қўшма тадбирларни юқори савияда ташкил этиш масалалари юзасидан атрофлича фикр алмашилди.

Учрашув якунида Ўзбекистон ва Япония муносабатларини турли стратегик йўналишларда янада кенгайтириш бўйича яқин ҳамкорликни изчил давом эттиришга келишиб олинди.