НАГОЯ, 12 ноябрь. /“Дунё” АА/. Япониянинг Нагоя шаҳрида Аити префектураси сиёсий ва ишбилармон доираларининг 100 дан ортиқ вакиллари иштирокида Тошкент вилояти билан ҳамкорликни ривожлантиришга бағишланган давра суҳбати бўлиб ўтди, деб хабар бермоқда “Дунё” АА мухбири.

Тадбир Ўзбекистоннинг Япониядаги элчихонаси томонидан “SYS Holdings” компанияси билан ҳамкорликда ташкил этилди. Унда Япония парламенти депутати Такако Судзуки, Аити префектураси вице-губернатори Юкио Эгути, префектуранинг собиқ губернатори Масааки Канда, маҳаллий ҳокимият органлари, молия институтлари ва йирик компаниялар раҳбарлари қатнашдилар.

Бизнес сектори вакиллари қаторида “Sumitomo Mitsui Banking Corporation”, “SMBC Nikko Securities”, “Hyakugo Bank”, “TOPPAN”, “Itochu Techno-Solutions”, “Fuji Dream Airlines”, “Kaikoukai” каби нуфузли компаниялар иштирок этди.

Тошкент вилояти ҳокими ўринбосари Жаҳонгир Мамажонов минтақанинг иқтисодий ва инвестициявий салоҳиятини тақдим этиб, япониялик ҳамкорларни саноат кооперацияси ва қўшма лойиҳаларни амалга оширишга таклиф қилди.

Такако Судзуки Ўзбекистонда амалга оширилаётган ислоҳотлар ва жадал иқтисодий тараққиётни юқори баҳолаб, булар япон бизнеси учун кенг имкониятлар очишини таъкидлади. У Аити префектураси тадбиркорларини Тошкент вилояти билан ҳамкорликни янада фаоллаштиришга чақирди.

Учрашувда икки халқ ўртасидаги тарихий алоқаларга, жумладан, япон ҳарбий асирларининг Алишер Навоий номидаги Тошкент давлат академик катта театри биносини қуришдаги иштироки ҳамда ўзбек халқининг японлар қабристонларига кўрсатаётган ҳурмат ва эътиборига алоҳида эътибор қаратилди.

Шунингдек, “AIGA” компанияси раҳбарияти билан IT-мутахассисларни тайёрлаш ва ишга жойлаштириш масалалари муҳокама қилинди. Компания ўзбекистонлик IT-талабгорлар ва ёш мутахассисларни Японияга ишга қабул қилишга тайёрлигини билдирди ҳамда 2027 йилда Ўзбекистонга ташриф буюриш режасини маълум қилди.

Аити префектураси Япониянинг етакчи саноат марказларидан бири ҳисобланади. Бу ерда автомобисозлик, маиший машинасозлик, авиация ва кимё саноати корхоналари жамланган бўлиб, Нагоя шаҳри минтақанинг маъмурий маркази ҳисобланади.