ТОКИО, 23 январь. /“Дунё” АА/. Сирдарё вилояти ҳокими Эркинжон Турдимов бошчилигидаги делегация амалий ташриф билан Япония пойтахтида бўлиб турибди, деб хабар бермоқда “Дунё” АА мухбири.

Ташриф доирасида етакчи компания ва корпорациялар раҳбарлари билан учрашувлар ўтказилмоқда. Хусусан, вилоят ҳокими “Momiki Co. Ltd.”, “Farmdo Group” ва “Altai Trading” компаниялари вакиллари билан ҳамкорлик алоқалари бўйича фикр-мулоҳаза алмашди.

Мулоқот жараёнида Сирдарё вилоятида қишлоқ хўжалиги маҳсулотларини қайта ишлаш, “Solar Farm” лойиҳаларини амалга ошириш, дуккакли экинлар ва бошқа қишлоқ хўжалиги маҳсулотларини Япония бозорига экспорт қилиш масалалари муҳокама қилинди.

Музокаралар якунида томонлар ўзаро манфаатли ҳамкорлик, қўшма лойиҳаларни амалга ошириш ва экспорт салоҳиятини оширишнинг аниқ йўналишларини белгилаб олди. Эришилган келишувлар икки томонлама иқтисодий алоқаларни мустаҳкамлашга хизмат қилиши таъкидланди.