ҚОҲИРА, 17 январь. /“Дунё” АА/. Ўзбекистон элчихонасида Мисрнинг “Drug Pharma” фармацевтика компанияси раҳбари доктор Аҳмад Аси ва унинг ўринбосари Камал Абделлатиф билан учрашув бўлиб ўтди, деб хабар бермоқда “Дунё” АА мухбири.

“Drug Pharma” 2016 йилда ташкил этилган хусусий фармацевтика компанияси бўлиб, юқори сифатли нутрицевтиклар, витамин-минерал комплекслар ҳамда педиатрия, гинекология, ортопедия ва умумий терапия йўналишлари учун мўлжалланган дори маҳсулотларини ишлаб чиқаришга ихтисослашган.

Учрашувда компания раҳбари Аҳмад Асси ўтган йили корхонанинг умумий айланмаси қарийб 10 миллион долларни ташкил этганини, жорий йилда эса бу кўрсаткич икки баравар ошиши кутилаётганини маълум қилди. Шунингдек, компания ишлаб чиқариш қувватларини босқичма-босқич кенгайтириб, замонавий технологик ускуналарни тадбиқ этаётгани ва халқаро тартибга солиш талабларига мувофиқ сертификатлаш ишларини олиб бораётганини таъкидлади. Экспорт географиясини кенгайтириш яқин истиқболдаги асосий устувор йўналишлардан бири сифатида қайд этилди.

Мулоқот давомида Ўзбекистон билан тайёр маҳсулотлар экспорти, ишлаб чиқаришни маҳаллийлаштириш ва технологиялар трансфери форматларида ҳамкорликни йўлга қўйиш имкониятларига алоҳида эътибор қаратилди.

Шу ўринда Аҳмад Аси Ўзбекистонга ташрифни ташкил этишга катта қизиқиш билдирди. У ҳамкорликнинг мавжуд имкониятларини, фармацевтика ва бошқа лойиҳаларга сармоя киритиш истиқболларини ўрганишдан, шунингдек, мамлакатимиз салоҳияти билан чуқурроқ танишишдан манфаатдор эканини билдирди.

Бундан ташқари, “Drug Pharma” раҳбари компания билан фаол ҳамкорлик қилаётган 500 га яқин шифокор учун ҳар йили хорижга сайёҳлик сафарлари ташкил этилишини маълум қилди. Мисрлик тадбиркорга Ўзбекистонни бундай саёҳатлар учун истиқболли йўналишлардан бири сифатида кўриб чиқиш таклиф қилинди. Бу, ўз навбатида, мамлакатимизнинг фармацевтика, тиббиёт ва инвестиция салоҳиятини илгари суриш, Миср тиббиёт ҳамжамияти билан профессионал алоқаларни кенгайтириш, ўзбек ишлаб чиқарувчилари, тиббиёт муассасалари ва ихтисослашган тузилмалари билан ҳамкорликка барқарор қизиқишни шакллантириш, ҳамда тиббий ва бизнес туризмини ривожлантиришга қўшимча туртки беради.

Учрашув якунида “Drug Pharma” компанияси ва Ўзбекистон фармацевтика тармоғини ривожлантириш агентлиги вакиллари ўртасида онлайн учрашув ташкил этиш, унинг доирасида келгусидаги ҳамкорликнинг аниқ йўналишларини муҳокама қилиш бўйича келишувга эришилди.