МОСКВА, 29 июнь. /“Дунё” АА/. Россиянинг “Вестник Кавказа” ахборот-таҳлилий агентлиги “Ўзбекистонга савдо ва паром флоти нима учун керак?” сарлавҳали мақолани эълон қилди, деб хабар бермоқда “Дунё” АА мухбири.

Материалда Ўзбекистон ҳукумати Ўрта коридорнинг ўзбек сегменти ўтказувчанлик қувватини кенгайтириш мақсадида Каспий денгизида ўзининг савдо ва паром флотини шакллантириш ниятида экани қайд этилган.

Агентлик маълумотларига кўра, логистикани ривожлантириш давлатлар иқтисодий ўсишининг асосий омилларидан бирига айланмоқда, чунки транспорт йўналишларини назорат қилиш савдони мустаҳкамлаш, инвестицияларни жалб қилиш ва иқтисодий имкониятларни кенгайтиришга хизмат қилади. Шу нуқтаи назардан, Ўзбекистоннинг Каспийдаги иштирокини кучайтиришга интилиши узоқ муддатли стратегиянинг бир қисми сифатида кўриб чиқилмоқда.

Нашрда қайд этилишича, шахсий кемаларни сотиб олиш ёки фрахт қилиш Тошкентга ташиш тезлигига мустақил таъсир кўрсатиш, миллий юк жўнатувчиларни зарур қувватлар билан таъминлаш ҳамда транспорт бозорининг бошқа иштирокчилари қарорларига боғлиқликни камайтириш имконини беради.

Мақола сўнгида ўз савдо флотини яратиш Ўзбекистоннинг ривожланишга янгича ёндашувидан далолат бериши, ўн йил аввал денгизга чиқиш имконига эга бўлмаган давлат учун бундай ташаббус ҳақиқатдан йироқ бўлиб туюлган бўлса-да, бугунги кунда бу мантиқий қадам сифатида кўрилаётгани таъкидланган.

“Жаҳон иқтисодиётининг парчаланиши кучайиб бораётган шароитда мавжуд имкониятлардан самарали фойдалана оладиган мамлакатлар устунликка эришади. Ўзбекистон ўзининг географик жойлашувини ўзгартира олмаса-да, жаҳон транспорт харитасидаги ўз ўрнини мустаҳкамлашга қодир”, – дея хулоса қилган “Вестник Кавказа”.