ҚОҲИРА, 12 октябрь. / “Дунё” АА/. Мисрнинг етакчи оммавий ахборот воситаларида Ўзбекистон Президенти Шавкат Мирзиёевнинг Туркманистонда бўлиб ўтган МДҲ Давлат раҳбарлари кенгаши мажлисидаги нутқига бағишланган туркум мақолалар эълон қилинди, деб хабар бермоқда “Дунё” АА мухбири.

Хусусан, “Elbalad”, “Maspero” ва “Gate Ahram” нашрларининг ёзишича, давлатимиз раҳбари ўз нутқида ўзгариб бораётган дунё ва кучайиб бораётган таранглик шароитида ўзаро ишончни мустаҳкамлаш ва ёндашувларни мувофиқлаштириш муҳимлигини таъкидлаган.

Шавкат Мирзиёев оддий товар айирбошлашдан қўшилган қиймат занжирларини биргаликда яратишга босқичма-босқич ўтиш, техник тўсиқларни бартараф этиш, мувофиқлик сертификатларини ўзаро тан олишни таъминлаш ҳамда давлат харидларида иштирок этиш имкониятларини кенгайтиришни таклиф қилган.

Шунингдек, озиқ-овқат ва ўғитлар экспортига чекловлар киритишдан олдин хабардор қилиш ва маслаҳатлашувлар ўтказиш механизмини жорий этиш ташаббуси алоҳида қайд этилган.

“Almontasaf” нашрида қайд этилишича, Ўзбекистон Президенти Туркманистоннинг Ҳамдўстликдаги раислигини юқори баҳолаб, МДҲ ташкил топганининг 35 йиллиги билан табриклаган. Нашр махсус иқтисодий зоналарни ягона тармоққа бирлаштириш, логистика марказлари ва ягона транспорт ахборот тизимини яратиш, 2029 йилни МДҲда Транспорт боғлиқлиги йили деб эълон қилиш ташаббусини қўллаб-қувватлашга эътибор қаратган.

Мақолада энергетика боғлиқлигининг узоқ муддатли концепциясини ишлаб чиқиш, айланма иқтисодиёт ва Гуманитар ҳамкорлик давлатлараро фонди фаолиятини кенгайтириш, Маданият сиёсати ва ижодий индустриялар форуми ҳамда Хивада МДҲ Ёшлар форумини ўтказиш таклиф қилингани таъкидланган.

“Al Diplomacy” журналида чоп этилган “Ашхободдан Бухорога қадар” сарлавҳали мақолада ушбу нутқ МДҲни умумий тарих бирлаштириб турувчи тузилмадан иқтисодий, технологик ва инсоний интеграция маконига айлантириш концепцияси сифатида баҳоланган. Шунингдек, Кенгашнинг навбатдаги мажлисини ўтказиш учун Бухоро шаҳрининг танланиши рамзий маънога эга экани қайд этилган.

“Eldameer” ва “Alawstelalamianews” нашрларида Президент Шавкат Мирзиёевнинг иқтисодий интеграция, саноат кооперацияси ҳамда Ҳамдўстлик мамлакатларининг махсус иқтисодий зоналарини ягона тармоққа бирлаштиришга қаратилган ташаббуслари кенг ёритилган.