ИСЛОМОБОД, 12 октябрь. /“Дунё” АА/. Покистоннинг “Times International News Service”, “The Daily Big Digit”, “Urdu Times”, “Daily Digital Posts”, “Daily Sapeher Times” нашрларида Туркий давлатлар ташкилотига аъзо мамлакатларнинг Евроосиё маконидаги ролига бағишланган мақолалар эълон қилинди, деб хабар бермоқда “Дунё” АА мухбири.

Мақолаларда ёзилишича, Туркий давлатлар ташкилоти (ТДТ)га аъзо мамлакатларнинг транспорт-логистика соҳасидаги ҳамкорлиги минтақавий интеграциянинг асосий ҳаракатлантирувчи кучларидан бирига айланиб бормоқда.

ТДТ доирасидаги ҳамкорлик йилдан-йилга мустаҳкамланмоқда. 2025 йилда ташкилотга аъзо давлатларнинг умумий иқтисодий салоҳияти 2,4 триллион доллардан ошди, унинг ўсиш суръати (6,8 фоиз) эса глобал кўрсаткичдан икки баробар юқори бўлди.

Транспорт кўрсаткичлари ҳам ушбу тенденцияни ифодалайди. Хусусан, 2026 йилнинг биринчи ярим йиллиги якунларига кўра, Ўзбекистоннинг ТДТ давлатлари билан экспорт-импорт юк ташувлари 8,5 миллион тоннани ташкил этиб, умумий халқаро ташувларнинг қарийб 29 фоизини қамраб олди.

Нашрларда 2026 йил 15 май куни Қозоғистоннинг Туркистон шаҳрида бўлиб ўтган норасмий саммит якунида қабул қилинган Декларация ҳақида алоҳида тўхталиб, ушбу ҳужжатда транспорт соҳасига оид қатор амалий вазифалар белгилангани таъкидланган.

Туркистон саммитида сўзга чиққан Президент Шавкат Мирзиёев Ўрта йўлакнинг стратегик ўрнидан келиб чиқиб, уни қурилиши жадал давом этаётган “Хитой–Қирғизистон–Ўзбекистон” темир йўли билан боғлашга алоҳида эътибор қаратиш лозимлигини қайд этган.

Материалларда қайд этилишича, минтақа интеграциясида “Хитой–Қирғизистон–Ўзбекистон” ва “Ўзбекистон–Афғонистон–Покистон” темир йўл лойиҳалари алоҳида ўрин тутади. Биринчи лойиҳа Хитойдан Европа ва Яқин Шарқ мамлакатларига олиб борадиган энг қисқа йўлакни шакллантирса, иккинчиси Жанубий Осиё темир йўл тизимини Марказий Осиё ва Евроосиё темир йўл тизимлари билан боғлайди.

Сўнгги йилларда Транскаспий йўлагига ҳам эътибор ортиб бормоқда. Ўтган беш йил мобайнида Ўзбекистон юкларининг Боку порти орқали транзити икки баробарга ошиб, 2025 йилда 1,2 миллион тоннага етди. 2026 йилнинг январь–июнь ойлари якунларига кўра, ушбу кўрсаткич 0,5 миллион тоннани ташкил этиб, ўтган йилнинг мос даврига нисбатан 2 фоизга ошган.