АР-РИЁЗ, 29 декабрь. /“Дунё” АА/. Саудия Арабистонининг нуфузли “Sahm News” нашри мухбири Абдулҳамид Ҳамид Абдуллоҳ ал-Кубби “Дунё” АА учун интервьюсида Ўзбекистон Президентининг Олий Мажлис ва халқига йўллаган Мурожаатномаси ҳақида фикр билдирди:

– Ўзбекистон Республикаси Президенти Шавкат Мирзиёев парламент ва мамлакатнинг кўп миллатли халқига мурожаат қилиб, унда 2025 йил якунларини сарҳисоб қилди ва 2026 йилга мўлжалланган тараққиётнинг асосий устувор йўналишларини белгилаб берди. Мурожаатнома дастурий характерга эга бўлиб, унда кейинги тўққиз йил давомида амалга оширилаётган демократик ва иқтисодий ислоҳотларнинг изчиллиги, Янги Ўзбекистонни очиқ, барқарор ва ижтимоий йўналтирилган давлатни барпо этиш йўли акс эттирилган.

Президент сўзининг аввалида ўтган йиллар давомида ислоҳотлар ҳар бир инсон, ҳар бир оила, ҳар бир маҳалла ҳаётида сезилганини таъкидлади. Булар шаҳар ва қишлоқларимиз қиёфасини ўзгартириш, замонавий мактаб, боғча ва шифохоналар барпо этиш, транспорт-логистика тизими ва рақамли хизматларни ривожлантиришда ўз ифодасини топмоқда.

Мураккаб халқаро вазият, глобал иқтисодий зиддиятлар ва хавфсизликка таҳдидлар кучайиб бораётганига қарамай, 2025 йилда Ўзбекистон учун улкан ютуқлар йили бўлди. Бу ютуқларга халқнинг фаол қўллаб-қувватлаши, ёшларнинг куч-ғайрати ва шижоати, маҳалланинг фуқаролик жамиятининг ноёб институти сифатидаги роли ошгани, тадбиркорлар, фермер ва деҳқонларнинг ташаббускорлиги, вазмин ва дўстона ташқи сиёсат туфайли эришилди.

Иқтисодий соҳада барқарор ривожланиш қайд этилди. Мамлакат тарихида илк бор ялпи ички маҳсулот ҳажми 145 миллиард доллардан ошди, ҳолбуки, тўққиз йил аввал бу кўрсаткич қарийб 100 миллиардни ташкил этарди. Экспорт 23 фоизга ўсиб, 33,4 миллиард долларга етди, олтин-валюта захиралари 60 миллиард доллардан ошди, жалб қилинган хорижий инвестициялар ҳажми 43,1 миллиард долларни ташкил этиб, ялпи ички маҳсулотнинг 31,9 фоизига тенг бўлди.

Президент бу кўрсаткичлар халқаро ҳамжамият ва нуфузли молия институтлари томонидан эътироф этилаётганини таъкидлади. Хусусан, Ўзбекистоннинг суверен кредит рейтинги “BB-“ даражасидан “BB” даражасига кўтарилди. Бу қарз олиш харажатларини камайтириш ва мамлакатнинг инвестициявий жозибадорлигини мустаҳкамлашга хизмат қилмоқда.

Инфратузилма соҳасида ҳам катта ўзгаришлар бўлди. Электр энергияси ишлаб чиқариш 85 миллиард киловатт-соатга етказилди, юз минглаб хонадонлар тоза ичимлик суви билан таъминланди, миллионлаб квадрат метр уй-жойлар, ижтимоий ва тижорат инфратузилмаси объектлари барпо этилди. Сўнгги тўққиз йилда мамлакатимизда жами 210 миллион квадрат метр турар ва нотурар жой объектлари барпо этилди.

Мурожаатномада ижтимоий сиёсатга алоҳида эътибор қаратилди. 2025 йилда яна 5 миллион кишида даромад манбаи пайдо бўлди, ишсизлик даражаси 4,9 фоизга, камбағаллик даражаси эса 5,8 фоизга камайди. 1 миллион 500 мингга яқин фуқаро камбағалликдан чиқарилди, 1 минг 435 та маҳаллага илк бор камбағалликдан ҳоли ҳудуд мақоми берилди. 2026 йилгача белгиланган камбағалликни 2 баробарга қисқартириш мақсадига муддатидан олдин эришилди.

Президент ўзбекистонлик спортчилар ва ёшларнинг муваффақиятларини ҳам қайд этди. Футбол бўйича миллий терма жамоа тарихда илк бор жаҳон чемпионатига йўл олгани тарихий воқеа бўлди. Шахмат бўйича ҳам катта ютуқларга эришилди, Жавоҳир Синдаров жаҳон кубогида ғолиб бўлди, халқаро олимпиада ва паралимпия мусобақаларида кўплаб медаллар қўлга киритилди.

Халқаро майдонда Ўзбекистон фаол мулоқот майдони сифатида ўз мавқеини мустаҳкамлади. 2025 йилда мамлакат Парламентлараро иттифоқнинг юбилей ассамблеяси, ЮНЕСКО тадбирлари, “Марказий Осиё - Европа иттифоқи” саммити, Халқаро иқлим форумига мезбонлик қилди. Марказий Осиё давлатлари билан тарихий ҳужжатлар, Европа Иттифоқи билан кенгайтирилган шериклик тўғрисида битимлар имзоланди, Япония ва АҚШ билан муҳим келишувларга эришилди.

Президент 2026 йилни “Маҳаллани ривожлантириш ва жамиятнинг юксалиш йили” деб эълон қилиб, маҳалла ижтимоий ҳамжиҳатлик, бирдамлик ва барқарорлик пойдевори бўлиб қолишини таъкидлади. Бунинг учун 9 мингдан зиёд маҳаллани меҳр-оқибат, адолат, таълим ва ижтимоий кўмак масканига айлантириш бўйича алоҳида давлат дастури қабул қилинади.

Мурожаатномада 2026 йилга мўлжалланган олтита асосий устувор йўналиш, жумладан, маҳаллалар инфратузилмасини ривожлантириш, иқтисодиётни технологик ва инновацион моделга ўтказиш, ички талабни рағбатлантириш, меҳнат бозори ва профессионал таълим тизимини ислоҳ қилиш, экологик мувозанат ва “яшил” энергетикани таъминлаш, давлат бошқаруви ва суд-ҳуқуқ тизимини янада модернизация қилиш вазифалари белгилаб берилди.

Президент мамлакатимизнинг стратегик мақсади - даромади ўртачадан юқори бўлган давлатлар қаторига кириш эканини таъкидлади. Прогнозларга кўра, 2026 йилда ялпи ички маҳсулот ҳажми 167 миллиард долларга етади, 2030 йилга бориб эса 240 миллиард доллардан ошиши мумкин.

Шавкат Мирзиёев Мурожаатномани якунлар экан, барчани ҳамжиҳатлик ва бирдамликка чақирди: “Агар биз ҳамжиҳат бўлиб, ягона халқ, ягона миллат бўлиб олға интилсак, кўзлаган улуғ мақсадларимизга албатта етамиз. Мен мард ва олижаноб халқимизга ишонаман”.