ПЕКИН, 30 декабрь. /“Дунё” АА/. Хитойнинг нуфузли “China CAMC Engineering” компанияси раиси Ван Бо Ўзбекистон халқини кириб келаётган янги йил билан табриклади:

– Ўтаётган йил компаниямиз учун жуда сермаҳсул бўлди. Хусусан, Ўзбекистон билан ҳамкорликда йирик лойиҳа – Олимпия стадиони қурилишини якунладик.

Ўзбекистон Президенти Шавкат Мирзиёев раҳнамолигида амалга оширилаётган кенг кўламли ислоҳотлар туфайли ҳамкорлигимиз жадал суръатларда ривожланмоқда. Олимпия стадионининг бунёд этилиши Ўзбекистонда спортни ривожлантиришга қаратилаётган улкан эътиборнинг яна бир ифодаси бўлди. Бундай майдонлар ўзбек ёшларининг спорт турлари бўйича янада катта натижаларга эришишида хизмат қилади.

Янги Ўзбекистоннинг жадал ривожланиш жараёнида иштирок этиш биз учун катта шараф. Ишончим комилки, мамлакатингиз билан ҳамкорлигимиз узоқ йиллар давом этади. Биз янги лойиҳалар ва йўналишларда ҳамкорлик қилишга доим тайёрмиз.

Сўнгги йилларда “China CAMC Engineering” компанияси Ўзбекистоннинг иқтисодий ислоҳотлар ва ижтимоий тараққиёт йўлидаги тарихий ютуқларига гувоҳ бўлди. Мамлакатнинг халқаро инвестициялар учун жозибадорлиги ортиб бормоқда. Бу, бутун минтақанинг ривожланиш жараёнларига ижобий таъсир кўрсатади.

Жорий йилда Ўзбекистонда яшил энергетикани ривожлантиришга муҳим ҳисса қўшадиган иккита энергетика лойиҳасига сармоя киритдик.

Биз бундан кейин ҳам Ўзбекистонда инвестиция лойиҳаларини амалга оширишда иштирок этишга, мамлакатни саноат жиҳатидан ривожлантириш, атроф-муҳитни муҳофаза қилиш ва замонавий шаҳарлар қурилишига кўмаклашишга тайёрмиз.

Кириб келаётган янги 2026 йилда Ўзбекистон халқига улкан муваффақият, тинчлик-омонлик ва фаровонлик тилайман!