БАЙРУТ, 15 июль. /“Дунё” АА/. Сўнгги бир кун ичида Исроилнинг Ғазо секторига уюштирган ҳужумлари оқибатида камида 13 нафар фаластинлик ҳалок бўлди, 18 киши жароҳатланди, деб хабар бермоқда “Дунё” АА мухбири “Anadolu” агентлигига таяниб.

Ғазо Соғлиқни сақлаш вазирлигининг сўнгги маълумотларига кўра, шифохоналарга янги ҳужумлар оқибатида ҳалок бўлган 12 кишининг ҳамда аввал олган жароҳатлари туфайли вафот этган бир кишининг жасади келтирилган. Қутқарув хизматлари етиб бора олмаётгани сабабли, бир неча жабрланувчи вайроналар остида ва йўлларда қолиб кетмоқда.

Идора баёнотига кўра, 2025 йил октябрь ойида ўт очишни тўхтатиш режими кучга кирганидан буён Исроил ҳужумлари натижасида 1123 нафар фаластинлик ҳалок бўлди, 3600 дан зиёд киши яраланган.

Янги тўқнашувлар АҚШнинг Ғазо бўйича тинчлик режасининг иккинчи босқичини амалга ошириш юзасидан давом этаётган музокаралар фонида юз бермоқда. Миср, Туркия ва Қатар воситачилигида Қоҳирада бўлиб ўтган сўнгги музокаралар ҲАМАСни қуролсизлантириш, Исроил қўшинларини олиб чиқиш ҳамда секторни тиклаш масалаларига бағишланди.

Музокараларга яқин манбаларга кўра, томонлар ўртасидаги ишончсизлик туфайли ҳозирча сезиларли ютуққа эришилмаган. ҲАМАСнинг таъкидлашича, Исроил биринчи босқич бўйича мажбуриятларини, жумладан, қўшинларни келишилган чизиққа олиб чиқишни бажармагунча, келишувнинг иккинчи босқичига ўтишга тайёр эмас.

Шу билан бирга, Исроилнинг қўшни мамлакатлардаги иштироки атрофида ҳам кескинлик сақланиб қолмоқда. “Axios” порталининг ёзишича, Дональд Трамп Исроилни Суриядан қўшинларини қайта жойлаштиришни бошлашга ва Ливандаги иштирокини қисқартиришга чақирган.

Бироқ Исроил ҳукумати қуролли гуруҳлар таҳдидларининг олдини олиш учун Ливан ва Суриянинг айрим ҳудудларида ҳарбий иштирокини сақлаб қолишини бир неча бор таъкидлаган. Бош вазир Биньямин Нетаньяху 18 июль куни Вашингтонга ташриф буюриб, Америка етакчиси билан учрашади.