ЗИГEН, 6 август. / "Дунё" АА/. Мамлакатимиз элчихонаси ташаббуси билан Германиянинг Зиген шаҳрида жойлашган Халқаро тиллар институтида "Ўзбекистон кечаси" ўтказилди, деб хабар қилмоқда "Дунё" АА мухбири.

Икки мамлакат ўртасида таълим соҳасидаги ҳамкорликни мустаҳкамлашга бағишланган мазкур тадбирда институт раҳбарияти, профессор-ўқитувчилар, мамлакатимиз дипломатлари ва ушбу олийгоҳда таҳсил олаётган ватандошлар иштирок этди.

Тадбирнинг расмий очилиш қисмида сўзга чиққан институт директори Мина Вильгельм Ўзбекистон аллақачон институтнинг яқин ҳамкорларидан бирига айланганини ва келгусида кенг кўламли лойиҳаларни ҳамкорликда амалга ошириш режалаштирилаётганини таъкидлади.

Қайд этилишича, жорий йилда институт раҳбарияти Тошкент, Самарқанд, Фарғона, Андижон ва Наманган шаҳарларида бўлиб, ушбу шаҳарлардаги ўқув марказлари билан ҳамкорлик ўрнатган. Унга кўра, тегишли имтиҳондан муваффақиятли ўтган талабгорлар "IFINS" кўмагида талабалик визасини олиши ва Германияга қўшимча таълим олиш учун – коллеж, институт ёки касб-ҳунар таълими дастури бўйича ўқишга келиши мумкин.

Таъкидлаш жоизки, мазкур қўшма лойиҳа икки мамлакат томонидан ҳам илиқ кутиб олинди. Унда нафақат тил ўргатиш, балки маданий интеграциялашув, янги мамлакатга талабаларнинг мослашиши ва яқиндан кўмак беришига эътибор қаратилади.

Ҳозирги кунда мазкур институтда 1000 нафарга яқин турли миллат вакиллари 40 та интеграцион ва талабаликка тайёрлов курсларида немис тилини ўрганмоқда.