ВЛАДИВОСТОК, 9 январь. /«Дунё» АА/. Ўзбекистоннинг Владивосток шаҳридаги Бош консуллиги дипломатлари кўмагида мазкур ҳудудда вақтинча ишлаётган юртдошимиз А.Т. ва унинг вояга етмаган қизи М.Ғ.нинг Ватанга қайтиши таъминланди, деб хабар бермоқда «Дунё» АА мухбири.

 Бош консулхонага йўлланган мурожаатга кўра, Самарқанд вилоятида туғилган А.Т. 2021 йил 12 октябрь куни туғилган қизи М.Ғ. билан бирга 2022 йилда Россиянинг Приморск ўлкасига вақтинча ишлаш учун келган. 2023 йил 22 декабрь куни ҳамюртимизнинг Владивосток шаҳридаги вақтинча турар жойида Приморск ўлкаси Вояга етмаганлар билан ишлаш бошқармаси ва маҳаллий полиция ходимлари томонидан текширув ўтказилган. Натижада, А.Т.нинг Россия ҳудудида ноқонуний равишда бўлиб тургани аниқланган. Ҳолат бўйича тегишли тартибда баённома расмийлаштирилган ва юртдошимизнинг вояга етмаган фарзанди Владивосток шаҳридаги «Краевой психоневрологический дом ребенка» марказига жойлаштирилган.

Бош консулхона ходимлари мурожаат асосида Приморск ўлкаси Вояга етмаганлар билан ишлаш бошқармаси вакиллари билан музокара ўтказишди. Натижада, М.Ғ. онасига қайтарилди. Шунингдек, ушбу оиланинг молиявий аҳволи инобатга олиб, А.Т. ва унинг вояга етмаган фарзанди М.Ғ.га Ўзбекистонга қайтиш учун чипта сотиб олиб берилди.

 Юртдошларимиз шу йил 7 январь куни «Uzbekistan airways» компаниясининг Владивосток-Тошкент йўналиши бўйича учган самолётида Ўзбекистонга кузатиб қўйилди.